Ministrja e Drejtësisë, Albulena Haxhiu, në seancën e sotme të Kuvendit është përplasur me shefat e grupeve parlamentare të PDK-së, Abelard Tahirin, dhe LDK-së, Arben Gashin, për situatën në veri, raporton InLajmi.
Ajo i akuzoi ata se po keqinformojnë kur po thonë se në veri s’ka gjyqtarë dhe prokurorë, derisa i pyeti edhe nëse janë në gjendje të japin dorëheqje nëse vërtetohet që s’është kështu.
“Mos i keqinformoni qytetarët. Me dalë shefi i Grupit Parlamentar të PDK-së dhe ai i LDK-së edhe me thënë që s’ka prokurorë dhe gjyqtarë në veriun e vendit tonë, shumë pak është me thënë keqinformim. Po i keqinformoni dhe po inkurajoni dhunuesit”, tha Haxhiu.
Tutje ajo tha se është në gjendje tani të shkojë në veri dhe t`ua dëshmojë se aty ka prokurorë dhe gjyqtarë.
“A je në gjendje zotëri Tahiri me dhënë dorëheqje nëse ajo çka ke thënë ti është e pavërtetë. Tash jam e gatshme që bashkë me ty dhe Arbenin të shkojmë në Mitrovicë në prokurori dhe gjykatë. Aty janë prokurorët dhe aty janë gjyqtarët, prandaj mos shpifni.”
.Haxhiu tha se për herë të parë Kosova ka pozicion të dinjitetshëm në raport me negociatat me Serbinë, “diçka që s’e kemi parë me herët”.
“Për herë të parë tre krerët e institucioneve janë të unifikuar me qëndrimet e tyre përballë Serbisë. Sigurisht që do të doja që këtij unifikimi t’i bashkohet edhe opozita”, përfundoi ajo. /InLajmi/
