Ministri i Mbrojtjes, Armend Mehaj ka thënë se një lajmë i mediave serbe është dezinformatë ku thuhet se kanë dhënë dorëheqje 10 pjesëtarë serbë të FSK-së, përcjell InLajmi.
Sipas, ministrit Mehaj deklarimet e tilla publike është tendencë e Beogradit që të largojë pjesëtarët serb nga institucionet e Republikës së Kosovës.
Mehaj, tutje ka shtuar se përpjekjet e Serbisë për të frikësuar pjesëtarët e Forcave të Sigurisë së Kosovës është e papranueshme, pasi shkelin vlerat demokratike evropiane.
Postimi i plotë i tij:
Referuar lajmit të publikuar nga mediumi serb, dhe të cituar edhe nga disa medie vendore, ju informojmë se është dezinformatë.
Nuk është e vërtetë që kanë dorëzuar dorëheqjet e tyre 10 pjesëtarë serb të Forcës së Sigurisë së Kosovës, janë 3 kërkesa për demobilizim që kemi pranuar prej kohësh dhe për të cilat janë duke u ndjekur të gjitha procedurat e rregullta.
Prandaj, deklarimet e tilla publike i shohim më tepër si tendencë e Beogradit zyrtar për të nxitur largimin e pjesëtarëve serb nga institucionet e Republikës së Kosovës, madje, edhe përmes kërcënimeve direkte.
Përpjekjet e Serbisë për të frikësuar pjesëtarët serb të FSK-ës janë të papranueshme, shkelin normat e civilizimit dhe vlerat demokratike evropiane.
Nuk presim që Serbia të ulë shkallën e kërcënimeve, por dhe Kosova si shtet nuk do të dorëzohet kurrë përpara këtyre presioneve.
Vlerësojmë dhe respektojmë kontributin e secilit pjesëtarë të Ushtrisë së Republikës së Kosovës për sakrificën dhe shërbimin ndaj atdheut.
Kosova është shtet multietnik, dhe Ushtria e Kosovës është garantuese e integritetit territorial dhe jetës së çdo qytetari pa dallim etnie.
Bashkë do të vazhdojmë rrugëtimin tonë drejt anëtarësimit në Bashkimin Evropian dhe në NATO!/InLajmi/.
