Ahmet Isufi, nënkryetar i Aleancës për Ardhmërinë e Kosovës thotë se kryeministri, Albin Kurti ka ftuar partitë opozitare në takim më shumë për të mjegulluar situatën në Veri të Kosovës.
Këto deklarata ai i bëri teksa komentoi largimin e kreut të AAK-së, Ramush Haradinaj nga takimi me Kurtin.
“Pikërisht takimi është ftuar që të shihen mundësitë e ndryshimit të gjendjes në të mirë të interesave të detyrave të Kosovës ndërsa sipas Haradinajt, Kurti është marrë me tema të cilat më shumë kanë pasë qëllim mjegullimin e situatës sesa një sqarim rreth gjendjes në pjesën veriore ku tani nuk kemi institucione për shkak se kanë lëshuar këto institucione qytetarët serbë atje”, tha ai.
Isufi thotë se Haradinaj ka lëshuar demonstrativisht takimin për shkak se “Kurti i kishte thirrur ata për t’u fyer”.
“Haradinaj ka lëshuar demonstrativisht takimin sepse në vend se të bën sqarimet e duhura për kohën edhe nga opozita mundësitë që të dilet nga kjo gjendje që të kemi një qetësi dhe stabilitet të sigurisë në vend përkundrazi ka pasur injorim dhe vetë fotografia e këtij takimi është mëse e qartë se Kurti ka dashur t’i thërras opozitën dhe t’i fyejë dhe t’ua tregojë medieve. Shikojeni mirë fotografijnë e takimit dhe do ta kutoni vetë edhe opinioni e ka të qartë”, u shpreh ai.
Madje, ai u shpreh optimist se në gjithë këtë situatë të krijuar në veri, Kurti të jetë në koordinim me bashkësinë ndërkombëtare.
“Ne epilogun e kësaj situate e shohim duke mos thënë që jemi në kontakt me bashkësinë ndërkombëtare por jemi të dakorduar sepse ndryshe është kur je në kontakt dhe dakorduar. Prandaj konsiderojmë se sidomos me SHBA duhet të jetë një relacion shumë më i mirëfilltë i kontaktit dhe i bisedimeve e marrëveshejve që duhet të jenë në fokus”, deklaroi Isufi.
Sipas tij, me shkallëzimin e vendimit për konvertimin e targave ilegale në “RKS”, është bërë një kthim prapa në marrëveshjen përfundimtare me Serbinë, shkruan Tëvë1.
“Ne konsiderojmë se një veprim i tillë është kthim prapa sepse ka pasë mundësi që pas një marrëveshje përfundimtare me Serbinë të vazhdojnë të gjitha termat që janë të kontestueshme teknike mes Kosovës dhe Serbisë dhe jo derisa është marrëveshja në tavolinë të shkohet në tema të cilat vet kjo Qeveri i ka kundërshtuar kur ishte në opozitë”, tha ai.
