Zëdhënësi i Bashkimit Evropian, Peter Stano, ka porositur se Kosova dhe Serbia duhet të punojnë drejt deesakalimit të situatës, meqë siç konsiderohet në Bruksel, tensionet mund të reflektohen edhe në rajon.
“Sa herë që ka krizë në nivel lokal, ajo mund të eksportohet në rajonin e gjerë. Nëse kemi një pikë tjetër të ndezjes në tokën evropiane ndërmjet Kosovës dhe Serbisë, askush nuk mund të parandalojë incidentet fatkeqe e kjo është diçka që nuk mund ta përballojë as Evropa, as Kosova e Serbia e as rajoni”, porositi Stano.
Ai i bëri thirrje palëve që të veprojnë me përgjegjësi dhe të gjejnë zgjidhje.
Ngjarjet e fundit, sipas Stanos, rrezikojnë të gjithë të arriturat e deritanishme në procesin e dialogut. Zëdhënësi i BE-së përsëriti thirrjen ndaj Kosovës, që të bëjë hapa të menjëhershëm drejt krijimit të Asociacionit të Komunave me shumicë Serbe.
Formimi i Asociacionit, sipas Stanos, është obligim ligjor i Prishtinës zyrtare, ndërsa dështimi në këtë drejtim sipas tij, dëmton jo vetëm sundimin e ligjit në Kosovë, por edhe kredibilitetin e Kosovës.
“Tash vërtetë u takon të 2 palëve që të zbatojnë obligimet që dalin nga marrëveshjet e Brukselit dhe nga dialogu”, porositi zëdhënësi Stano.
Ai konfirmoi se shefi i diplomacisë evropiane, Josep Borlell, në fundjavë ka biseduar me kryeministrin e Kosovës, Albin Kurti, si dhe presidentin serb, Aleksandar Vuçiq, ndërkohë që i dërguari evropian për dialog Mirosllav Lajçak është në kontakt të rregullt me homologët në rajon dhe më gjerë, shkruan RTK.
Krejt kjo, siç thuhet, po behën në kuadër të përpjekjeve të Bashkimit Evropian që të bëjnë që Kosova dhe Serbia të gjejnë zgjidhje dhe të angazhohen në dialog të sinqertë, sepse kjo është e vetmja mënyrë që të çon drejt perspektivës së BE-së të të 2 partnerëve.
