Këshilli për Mbrojtjen e të Drejtave e të Lirive të Njeriut ka reaguar për zhvillimet e fundit në vend lidhur me largimin e përfaqësuesve të Listës Serbe në institucionet qendrore si dhe në komunat veriore të vendit, përcjell, InLajmi.
Në njoftimin zyrtar të tyre ndër të tjera thuhet se “Vendimi i kryeministrit Albin Kurti për targat nuk ka qenë i duhur dhe se do të duhej të dëgjohej kërkesa e ndërkombëtarëve për shtyrjen e afatit të zbatimit për 10 muaj”
“Qeveria, ose është dashur të pranojë këtë shtyrje të afatit duke kërkuar garanca me shkrim, ose është dashur të mos e shtyjë për asnjë ditë të vetme. Realisht, është e qartë që largimi i serbëve nga institucionet e Kosovës ka qenë i planifikuar mirë dhe tabelat janë përdorur për të vënë në veprim përshpejtimin e formimit të Asociacionit e që tani e ka marrë formën e kushtëzimit, si nga Serbia ashtu edhe nga ndërkombëtarët”, thuhet në njoftim.
Tutje, vazhdon reagimi duke cituar deklarimin e KLMDNJ-së edhe në rastin e kërkesave amerikane e evropiane për fillimin e Formimit të Asociacioni të komunave serbe.
“KMDLNj nuk e ka të qartë nëse këtë e kanë dëgjuar ndërkombëtarët që po insistojnë në formimin e menjëhershëm të Asociacionit, pa e kushtëzuar apo ndërlidhur me njohje reciproke. Vetëm mund ta merrni me mend se si do të sillen udhëheqësit e komunave të përfshira në Asociacion, kur kompetencat e tyre do të jenë shumëfishë më të mëdha se që i kanë sot?! Prandaj, KMDLNj propozon që Asociacioni të formohet sipas rekomandimeve të Gjykatës Kushtetuese të Kosovës dhe të bëhet pjesë e Pakos së Marrëveshjes përfundimtare”, përfundon njoftimi zyrtar nga KLMDNJ.
