Drejtuesi i Institutit për Afirmimin e Marrëdhënieve Ndëretnike, Famir Sheholli, ka paralajmëruar se situata në ditët në vijim mund të përkeqsohet, pas dorëheqjes së Listës Serbe nga institucionet e Kosovës.
Sheholli tha se Kosova mund të kthehet në situatën e para-pavarësisë duke paralajmëruar rritje të forcave ndërkombëtare të sigurisë.
“Frikësohemi se po kthehemi në vitet e para shpalljes së pavarësisë. Atje do të kemi forca më të shumta të KFOR-it dhe faktorit ndërkombëtar dhe fatkeqësisht të UNMIK-ut, duke e kthyer rezolutën 1244 në vepër në veri”, tha Sheholli.
Sheholli tha se si institut ka 2 muaj që kanë paralajmëruar se Lista Serbe do të dorëhiqet.
Ndërkohë, ai tregoi se nesër do të organizohet një protestë masive në veri, ku do të ketë 3 kërkesa.
“Tash nesër është një protestë masive në veri. Ata do t’i kenë 3 kërkesa; Kërkesa për të anuluar vendimin për targa, kërkesa për formimin e Asociacionit të Komunave me Shumicë Serbe dhe kërkojnë që një marrëveshje që e quajnë atë të Brukselit për vendosjen e një komandanti serb në veri, me miratimin e katër komunave serbe”, deklaroi Sheholli.
Tutje ai tha se situata është jashtëzakonisht e tensionuar dhe se në veri po shihen njerëz të ndryshëm që nuk janë banorë të asaj zone, shkruan Klan Kosova.
“Është koha e fundit që ne duhet t’i dëgjojmë propozimet e SHBA-së. E këshilloj kryeministrin Albin Kurti që urgjent të bashkëpunojë më SHBA-në, t’i dëgjojë këshillat që na kanë propozuar për të dalë nga një situatë e rrezikshme”, përfundoi Sheholli.
