Ministri i Punëve të Brendshme, Xhelal Sveçla, i shqetësuar ka reaguar ndaj sulmit të së moshuarës në Pejë nga 2 vajza, ndërsa tha se veprimet e tilla të dhunës janë të papranueshme kudo që ato ndodhin, përcjell InLajmi.
Sipas tij, i rëndë e i papranushëm është akti i dhunës, por në veçanti janë më të rënda ato kur ndodhin brenda institucioneve që janë për të ofruar ndihmë e përkujdesje.
Ai bëri thirrje për sjelljen para drejtësisë kryerëset e këtij akti çnjerëzor.
Postimi i plotë i tij:
Me shqetësim kemi parë të gjithë pamjet e keqtrajtimit të një gruaje të moshuar nga një grup vajzash, në një shtëpi të përkujdesjes së të moshuarve në Pejë.
Veprime të tilla të dhunës janë të papranueshme kudo që ndodhin, por në veçanti janë më të rënda kur ndodhin brenda institucioneve që konsiderohen të ofrojnë ndihmë dhe përkujdesje.
Nga Policia e Kosovës jam njoftuar që deri më tani janë arrestuar dy nga dhunueset dhe hetimet po vazhdojnë. Fuqishëm bëj thirrje për sjelljen para drejtësisë të të gjithë personave të implikuar në këtë akt çnjerëzor.
