Administrata Tatimore e Kosovës është bërë shembull i punës së mirë për institucionet simotra rajonale dhe evropiane.
Kjo u tha në kuadër të konferencës rajonale mbi Konsolidimin e Mbledhjes së Detyrueshme, që u organizua për herë të parë në Kosovë nga CEF Qendra e Ekselencës Financiare, Slloveni, nё bashkëpunim me FMN-nё, Administratën Tatimore tё Kosovës dhe Autoritetin Tatimor tё Holandës.
Kjo konferencë dhe ky rezultat i dalë nga aty, sipas zëdhënëses së ATK-së, është veprimi më i mirë për këtë fundvit për institucionin kosovar.
Valentina Bytyqi-Sefa, pos për këtë foli edhe për ndikimin e krizës ekonomike në grumbullimin e tatimit. Aktualisht, sivjet, grumbullimi i ATK-së është rreth 90 milionë euro më shumë sesa në kohën e njëjtë e vitit të kaluar.
Por, kjo shumë, sipas zëdhënëses së ATK-së nuk është fryrë si rezultat i ngritjes së çmimeve.
Valentina Bytyqi-Sefa në Sytë 7 tha se “inflacioni nuk ka impakt në mbledhjen e tatimit, sepse ne mbledhim tatim brenda vendit”.
“Nëse ka impakt inflacioni, atëherë ka impakt në hyrje, në akcizë e në të hyrat doganore. Kurse në të hyrat tatimore nuk mundet me pas impakt inflacioni ku aktualisht jemi. Por, nëse ulet apo hiqet TVSH-ja për produkte esenciale, siç po kërkojnë subjektet opozitare, si masë lehtësuese për qytetarët, kjo politikë, më pas do të ndikojë në të hyrat e ATK-së”, tha ajo
“Ne kemi pasur përshkallëzim të TVSH-së në kohë të pandemisë nga 18 në 8 %. Sigurisht ulja ose heqja e TVSH-së do të ketë dëmtim ose rënie të të hyrave”.
