“Skajshmërisht të rëndësishme” e quajti ambasadori serb në Uashington, Marko Gjuriq, thirrjen e Sekretarit amerikan të Shtetit, Anthony Blinken, për të shtyrë për një periudhë dhjetë-muajshe çështjen e riregjistrimin të targave të paligjshme serbe në pjesën veriore të Kosovës.
Në një intervistë për televizionin serb, Tv Happy, Gjuriq tha se kohët e tashme në marrëdhëniet e Kosovës me SHBA-në, “kanë ndërruar”. Veçanërisht ai iu referua thirrjeve amerikane drejtuar Kosovës për çështjen e targave.
“Këso gjërash kanë qenë të paimagjinueshme në periudhat e mëhershme, sepse kishte mbështetje të pastër ndaj aktiviteteve politike të Prishtinës, ndërsa sot shumë e kritikojnë Kurtin, i cili ia doli të shtyjë mbështetësit tradicional larg vetes”, ka thënë Marko Gjuriq.
Madje, ai shtoi se shqiptarët e Kosovës dhe qeveria e Albin Kurtit “kanë humbur monopolin e marrëdhënieve të mira” me SHBA-në dhe Perëndimin, duke pretenduar edhe se Serbia ka arritur të “ndërrojë imazhin me argumente më të forta dhe më serioze”, raporton gazeta online Reporteri.net.
Rreth imazhit të Serbisë, europarlamentarë e zyrtarë të lartë perëndimor e konsiderojnë atë më së keqti që nga viti 1999. Kjo për shkak të deklarimit të neutralitetit ndaj agresionit rus mbi Ukrainën, mosvendosjes e sanksioneve ndaj Federatës Ruse, si dhe bashkërendimin e politikë së jashtme me Kremlinin, qendër politike kjo e izoluar nga bota perëndimore që nga 24 shkurti.
