Është çast vendimtar për të marrë në dorë fatet tona dhe për të bërë ndryshimin, të gjithë bashkë, pa dallim! Tirana sot ka nevojë për alternativë, shpresë, vëmendje dhe respekt ndaj qytetarëve”. Me këto fjalë Gert Bogdani shpalli kandidaturën e tij në Primaret e Partisë Demokratike, për garën në zgjedhjet lokale për bashkinë e Tiranës.
Nga mungesa e hapësirave të gjelbra, ambienti i ndotur, transporti publik, betonizimi dhe mungesa e vëmendjes ndaj qytetarëve, Bogdani renditi problemet e sotme të kryeqytetit shqiptar dhe premtoi një alternativë tjetër qeverisëse në shërbim të qytetarëve.
“Kam marrë vendimin për të kandiduar për Kryetar të Bashkisë së Tiranës; sepse kam bindjen e plotë se Tirana ka ende mundësinë të jetë një qytet në shërbim të qytetarëve dhe jo të pushtetarëve; Sepse kam bindjen e plotë se Tirana ka ende potencialin për t’u bërë kryeqyteti tek i cili të rinjtë vijnë për të ndërtuar të ardhmen dhe ëndrrën e tyre, dhe jo qyteti nga i cili ikin për të mos u kthyer më! Sepse kam bindjen e plotë se Tirana duhet dhe do të jetë qyteti i të gjithëve, përtej prejardhjes, partisë, besimit, moshës apo gjithçkaje tjetër! Tirana më shumë se kurrë, ka nevojë për ndryshim dhe koha për ndryshim është tani! Shpallja e kandidaturës në këtë proces primaresh, është zotimi im për të shërbyer me përkushtim dhe përulësi – për t’i prirë kthesës për ndryshim që Tirana kërkon dhe meriton si metropol i shqiptarëve brenda dhe jashtë vendit. Për t’i prirë rimëkëmbjes së Tiranës, e cila do të vijë vetëm përmes një vizioni të qartë të bazuar mbi transparencë dhe një programi që në qendër ka dinjitetin dhe mirëqenien e qytetarit. Një programi që vendos prioritetet e duhura dhe që jetëzohet përmes konsultimit dhe përfshirjes së gjerë të intelektualëve, profesionistëve, krijuesve, aktivistëve, qytetarëve dhe komuniteteve, brenda Shqipërisë dhe në Diasporë – të cilët pushteti i sotshëm u ka mbyllur çdo derë, duke i shtyrë sistematikisht dhe me arrogancë jashtë zhvillimeve dhe projekteve madhore që shënojnë të tashmen dhe të ardhmen e Kryeqytetit. Një programi që ka në qendër qeverisjen me përkushtim dhe punën e palodhur për të ngritur standardet e shërbimeve për qytetarët dhe lehtësive për sipërmarrjet private dhe profesionistët e lirë!”, u shpreh Bogdani, shkruan A2 CNN
Prezantimi i Gert Bogdanit, në Primaret e Partisë Demokratike, për garën në zgjedhjet lokale
