Sekretari i PDK-së për Marrëdhënie Ndërkombëtare, Bernard Nikaj, tha sot se vendimi i djeshëm i qeverisë në lidhje me targat e veturave e vërteton përsëri faktin se kryeministri Albin Kurti edhe po tërhiqet nga zbatimi i vendimeve të tij edhe po e vendos Kosovën në pozicione të kundërta me partnerët ndërkombëtarë.
“I gjithë debati i ditëve të fundit ka qenë i fokusuar në çështjen se a do të zbatohet vendimi legjitim i qeverisë nga data 1 nëntor, apo do të aprovohet kërkesa e SHBA-ve për shtyrje të zbatimit të vendimit për 10 muaj. Në fund, kryeministri ka vendosur në mënyrë të njëanshme që ta shtyjë zbatimin e vendimit për gati 6 muaj, duke u tërhequr nga qëndrimi i tij, por edhe duke e sjellë Kosovën në pozitë të pafavorshme në raport me SHBA-të dhe partnerët e tjerë ndërkombëtarë”, tha Nikaj të shtunën në një konferencë për media.
Tutje ka theksuar Nikaj se qeveria do të duhej ose ta zbatonte vendimin, që e cilësojnë legjitim, pa shtyrje ose të koordinohej plotësisht me partnerët ndërkombëtarët, derisa shton se me vendimin e djeshëm nuk është bërë asnjëra nga këto.
“Në këtë situatë, qëllimi i qeverisë do të duhej të ishte ose zbatimi pa shtyrje të mëtejme i vendimit legjitim në funksion të sundimit të ligjit edhe në veri të vendit, ose koordinim i plotë me partnerët ndërkombëtarë për të fuqizuar pozicionin e Kosovës në procesin e Dialogut. Por, me vendimin e qeverisë nuk u arrit asnjëri nga këto qëllime. Një situatë të tillë në raport me SHBA-të Kosova nuk e ka pasur asnjëherë në të kaluarën”, u shpreh Nikaj.
Ai në emër të subjektit të tij shpreh mospajtimin për qasjen injoruese të Kosovës në raport me shtetin më të rëndësishëm.
“Si PDK shprehim shqetësimin dhe mospajtimin tonë me këtë qasje injoruese dhe mosbashkëpunuese me shtetin më të rëndësishëm për perspektivën zhvillimore të vendit tonë. Kjo vlen edhe për raportet tona me shtetet kyçe të Bashkimit Evropian. Përderisa kemi mbështetur dhe mbështesim çdo veprim e vendim legjitim e kushtetues të qeverisë e të institucioneve shtetërore për shtrirjen e ligjshmërisë në çdo cep të Kosovës, ne besojmë se këto qëllime më së miri arrihen duke pasur komunikim dhe koordinim me partnerët tanë ndërkombëtarë”, u shpreh Nikaj, derisa fton Qeverinë e Kosovës që të dalë me qëndrim zyrtar për planin franko-gjerman, për të cilin thotë “që tash e sa ditë ndodhet në Zyrën e Kryeministrit, por po mbahet fshehtë nga qytetarët e Kosovës.
Ai tha se qytetarët e Kosovës duhet ta kuptojnë qëndrimin zyrtar të qeverisë për këtë plan këtu në Prishtinë e jo të informohen për detajet e tij nga konferencat në Beograd, duke iu referuar deklarimit të djeshëm të zëvendëskryeministrit Besnik Bislimi.
