Ish-ministri i Shëndetësisë, Armend Zemaj, ka thënë se Qeveria Kurti nuk ka plan dhe as aftësi që të menaxhojë me sektorin e shëndetësisë, derisa në këtë sektor janë realizuar vetëm 5 % nga investimet kapitale, raporton InLajmi.
Zemaj, përveq shumë problemeve në sektorin e shëndetësisë, kujtoi edhe çështjen e sigurimeve shëndetësore, për çka tha ai se në këtë drejtim qeveria aktuale nuk ka bërë asnjë hap.
“Qeveria Kurti s’ka plan dhe duket se s’ka as aftësi që të menaxhojë me shëndetësinë. Një ministër e largoi në mes të pandemisë që të fitojë pushtet. Ministri i parë i dështuar që u largua që të kandidojë për të parin e Prishtinës”, shpreh deputeti i LDK-së Zemaj.
Tutje Zemaj, gjatë konferencës për media të premten nga selia e partisë së tij, kritikoi qeverisjen aktuale edhe për mungesë të barnave esenciale si dhe kujtoi edhe dorëheqjet e 2 ministrave.
“Kurti caktoi një ministër që nuk kishte njohuri bazike të realitetit në Kosovë. Shumicën e mandatit e kaloj nëpër konferenca. Dorëheqja edhe e një ministri dhe caktimi i një ekipi ekzekutiv tregon se kryeministri edhe kjo qeveri e ka pranuar dështimin në këtë sektor”, theksoi Zemaj.
Dikur ishte vetë drejtues i sektorit shëndetësor në nivelin sekondar e terciar, ndërsa tani si deputet Zemaj, vuri në theks edhe mungesën e investimeve kapitale në shëndetësi.
“Vetëm 5 për qind investime kapitale në shëndetësi janë realizuar gjatë këtij viti. Kjo është një mesatare edhe më e tmerrshme se një mesatare prej 10 për qind e realizimi nga të gjitha ministritë e vendit. Lista e pritjes ka arritur deri në fund të vitit të ardhshëm”, ka thënë Zemaj.
