Presidentja e Komisionit Evropian, Ursula von der Leyen, ka thënë se Kosova i ka përmbushur të gjitha kriteret për liberalizimin e vizave, raporton InLajmi
Ajo, pas takimit që pati sot me presidenten Vjosa Osmani në një konferencë për media, deklaroi se qytetarët dhe institucionet e Kosovës mund të llogarisin edhe në të personalisht për procesin e liberalizimit të vizave.
“Kosova e ka rikonfirmuar edhe një herë se ka përmbushur kriteret për liberalizim të vizave”, është shprehur ajo
“Për aspektin e liberalizimit të vizave e dini që e keni një aleat dhe mua personalisht. Kosova e meriton liberalizimin e vizave, e di se sa e rëndësishme është kjo për ju, i keni përmbushur të gjitha standardet. Në fakt ishte vlerësim i yni tashmë që kjo të bëhej në korrik të vitit 2018, tashmë e kemi rikonfirmuar që i keni plotësuar të gjitha kriteret”.
Ursula von der Leyen shtoi se shumica në Këshillin Evropian janë në anën e Kosovës.
“Detyra jonë është tani të bindim tërë Këshillin Evropian, shumica e tyre janë në anën tuaj, është shumë mirë që këto diskutime kanë rifilluar, kemi punuar me presidencën çeke mjaft shumë, kërkohen shumë përpjekje diplomatike dhe sqarime. Mirëpo, mund të llogarisni në mua personalisht dhe në komision sepse ne do të bëjmë gjithçka duke e ditur se po bëni një punë mbresëlënëse”, ka thënë Von der Leyen./InLajmi/
