Lista Serbe ka munguar edhe këtë të enjte në seancën plenare të Kuvendit të Kosovës. E mungesën e deputetëve të kësaj partie e ka vënë në dukje kryeparlamentari Glauk Konjufca.
Derisa grupet parlamentare po jepnin propozimet e tyre për zëvendësimin e anëtarëve në komisionet parlamentare, radha i erdhi edhe Listës Serbe, por ata nuk janë në seancë.
Konjufca tha se deputetët e kësaj partie po mungojnë pasi kanë shkuar në Beograd.
“Tani grupet parlamentare propozojnë zëvendësimet e tyre në komisionet parlamentare. Lista Serbe është në Beograd”, u shpreh kryeparlamentari.
Tash e disa muaj Lista Serbe nuk merr pjesë në punimet e Kuvendit të Kosovës dhe i bojkoton në tërësi angazhimet e saj, shkruan Telegrafi.
Ndërsa, sot kur Kuvendi po mban seancën e radhës, deputetët e kësaj partie ndodhen në Beograd ku po marrin pjesë në punimet e Këshillit Kombëtar të Sigurisë së Serbisë, të kryesuar nga presidenti Aleksandar Vuçiq.
