Shefi i Grupit Parlamentar i PDK-së, Abelard Tahiri, të martën pas mbledhjes së Kryesisë së Kuvendit tha se çfarëdo veprimi të cilin e ndërmerr Qeveria për çështjen e targave e që respekton sovranitetin e vendit, e ka përkrahjen e PDK-së, raporton InLajmi.
Ndërsa shprehu mbështetjen e qeverisë për vendimin e konvertimit të targave, Tahiri tha se secili veprim i Qeverisë së Kosovës në raport me Serbinë duhet të jetë i koordinuar me SHBA-të.
“Secili veprim i qeverisë së Republikës së Kosovës që do të ndërmerret në raport me Republikën e Serbisë, padyshim që është shumë e rëndësishme që të koordinohet me ShBA-në, mirëpo më e rëndësishmja është që ky koordinim të rezultojë me respektimin e sovranitetin e Kosovës”, u shpreh Tahiri, duke shtuar se nuk duhet lejuar pafundësisht përdorimi i targave të vjetra.
“Nuk mund të lejohet pafundësisht shfrytëzimi i targave të tilla dhe besoj që çfarëdo veprimi të cilin e ndërmerr qeveria e Kosovës e që respekton sovranitetin e vendit tonë edhe në atë pjesë të Kosovës, padyshim që do ta ketë përkrahjen e PDK-së”, u shpreh Tahiri.
Ndryshe, theksojmë se sipas deklarimit të kryeministrit Albin Kurti, shtyerje të afatit për konvertimin e targave RSK nuk do të ketë.
