Shkrimtari dhe publicisti Veton Surroi ka thënë që afati për targat duhet të shqyrtohet në pajtim me kërkesat e bashkësisë ndërkombëtare.
“Edhe bisedat që po i zhvillon bashkësia ndërkombëtare me pushtetin në Kosovë, më duket se është e përqendruar tek çështja e sigurisë dhe konteksti i sigurisë evropiane në të cilin jemi duke jetuar. Pra, ideja është që Kosova dhe Serbia duhet të tejkalojë mundësinë që çfarëdo shkasi të përdoret për ndërhyrjen e forcave dhe fuqive të treta. Në këtë rast, mendohet për ndërhyrje të Rusisë dhe të diversioneve që mund t’i shkaktojë ajo, ose fuqive të tjera të bashkëlidhura me Rusinë. Në këtë drejtim mendoj që është e përqendruar brenga”, tha ai.
Surroi nëRubikonnë Klan Kosova ka potencuar që Rusia prej kohësh ka ndërhyrë në Kosovë, sidomos në pjesën veriore.
“Rusia jo tash, por ka prej kohësh që ka pasë forma të ndërhyrjes në Kosovë dhe posaçërisht në pjesën veriore të Kosovës. Gjatë vitit të kaluar ka pasë edhe formacione që janë duke u ndërtuar siç i pamë në rastin e paraqitjes së këtij problemi në kufi; në momentin kur u vunë barrikadat (në gusht të këtij viti”. Nuk ishte një protestë popullore, por kishim të bëjmë me formacione të organizuara”.
“Rusia ka mundësi të provokojë çdo ditë dhe në çdo mënyrë. Por këtu kemi të bëjmë me një çështje tjetër, meqë kemi një kërkesë të atillë prej shteteve mike dhe natyrisht që këto duhet marrë seriozisht. Është çështje e cila në pajtim me kërkesat e bashkësisë ndërkombëtare duhet të shqyrtohet, a mund të gjendet ndonjë formë tjetër. Duhet të ndodhin disa hapa e njëri është deklarimi i bashkësisë ndërkombëtare që targat janë ilegale, e që ato doemos duhet të zëvendësohen me targa legale të emetuara në Kosovë dhe që nuk do të ketë proces tjetër negociator për targat”, ka thënë Surroi.
