Kryeministri i vendit, Albin Kurti, në hapjen e Samitit të Ballkanit Perëndimor “The Western Balkans Summit 2022’’, organizim ky i The Economist në bashkëpunim me Zyrën e Kryeministrit të Kosovës tha se epokës së korrupsionit dhe pandëshkueshmërisë në Kosovë është duke i ardhur fundi, raporton InLajmi.
Shefi i ekzekutivit të vendit, në këtë samit foli edhe për punën e qeverisë gjatë 1 vit e gjysmë, duke treguar edhe të arriturat.
Ai përmendi luftën kundër krimit e korrupsionit, duke shtuar se janë rritur investimet e huaj e janë hapur 40 mijë vende të punës.
Sipas kryeministrit esenciale në qeverisjen e tij është sundimi i rendit dhe ligjit.
“Me demokraci nënkuptojmë krijimin e shteteve funksionale. Qeveria jonë e ka marr mandatin para 2 vitesh dhe esenciale për demokracinë është sundimi i rendit dhe ligjit. Me Qeverinë tonë Republika ka bërë përparime shumë, jemi ngritur në indeksin e luftës kundër korrupsionit”,
tha Kurti teksa përmendi edhe aksionin e prokurorisë në Brezovicë.
Kreu i ekzekutivit të vendit ndërkaq ka kujtuar edhe disa aksione që lidhen me luftimin e krimit dhe korrupsionit.
“Autoritetet ligj zbatuese kanë ndërmarrë 800 operacione policore ndaj krimit dhe korrupsionit dhe kanë arrestuar mbi 2000 njerëz duke përfshirë afërsisht 300 zyrtarë publikë e shtetërorë. Kanë shkatërruar 68 banda kriminale dhe kanë konfiskuar mbi 1.8 milionë drogë, 75 villa të sekuestruara për shkak të ndërtimit të paligjshëm dhe lista e pronarëve ishte tronditëse por jo befasuese – gjyqtarë të nivelit të lartë, biznesmenë të pasur, politikanë dhe të afërmit e tyre”, është shprehur kryeministri Kurti.
Ndërsa ka folur për rritjen ekonomike në vend dhe investimet e huaja, kryeministri tha se kemi rritje të investimeve të huaja.
“Investimet e huaja janë rritur, kemi rritur 40 mijë vende të punës dhe e keni buxhetin më të madh ndonjëherë. Investitorët e huaj e kanë më lehtë për të investuar në Kosovë sepse nuk kanë më nevojë për t’i korruptuar autoritetet”, u shpreh i pari i qeverisë.
Nuk e mohoi krizën botërore e as krizën në Kosovë, por tha Kurti se Kosova e menaxhon më lehtë krizën.
“Edhe pse ka kriza që po e prekin botën, në Kosovë mund të menaxhohet më lehtë kjo krizë, dhe Kosova po e përballet me një krizë që po e prek shumë, si ngritja e çmimit të energjisë dhe atyre të produkteve esenciale. Në 2 dekadat e fundit ka pasur mungesë të gjenerimit të energjisë dhe tregon dështimin për riparimin e termocentraleve”, deklaroi Kurti.
Mario Bikarski, ekspert për Ballkanin Perëndimor, tha se vendet e rajonit mund të përballen me mungesë të energjisë dhe se inflacioni ka ndikuar shumë te bizneset.
“Inflacioni është duke ndikuar në shumë biznese e sidomos në ato që janë të varura nga energjia. Vendet e rajonit mund të përballen me mungesë të energjisë, të cilët atakohen nga ngritja e çmimeve”, theksoi kryeministri.
Temë diskutimi në këtë samit është pushtimin rus në Ukrainë, si dhe rritja e çmimeve që po e çojnë botën në kriza të shumëfishta.
Pjesë e këtij samiti do të jetë edhe oficeri i lartë i Forcave Ajrore Mbretërore të Britanisë së Madhe, Stuart Peach.
