Ish-ambasadori i Gjermanisë në Shtetet e Bashkuara të Amerikës, Wolfgang Ischinger në një intervistë ekskluzive për Pressing në T7 ka folur për çështjen e dialogut mes Kosovës dhe Serbisë dhe dinamikën e re në të cilën është involuar Perëndimi. Ai ka thënë se Kosova duhet të zgjidh çështjen e Asociacionit dhe ta heq qafe si problematikë, meqë e njejta ka qenë dhe vazhdon të jetë burim i trazirave të mundshme.
Ischinger ka thënë se lufta dhe agresioni rus në Ukrainë ka ndikuar në një mënyrë indirekte në çështjen e dialogut në mes të Kosovës dhe Serbisë, meqë siguria në Evropën Juglindore, konkretisht në rajonin e Ballkanit Perëndimor nuk është mjaftueshëm stabile.
Diplomati gjerman ka thënë se duke qenë se ka ende çështje të pazgjidhura të njohjes dhe territoriale ka bazë që BE-ja të jetë e shqetësuar, meqë s’përjashton as faktin që influenca ruse mund të shpërthejë edhe më shumë në të ardhmen.
Kjo situatë thotë Ischinger është edhe arsyeja pse tashmë ka një interes të shtuar të Brukselit, Berlinit, Parisit dhe të tjerëve për të zgjidhur problemin mes Kosovës dhe Serbisë.
“Kështu që po, në mënyrë indirekte çështja e pazgjidhur e situatës së sigurisë në këtë pjesë të Evropës është çështje e një shqetësimi të madh. Dhe kjo është një arsye pse tani ka një interes shumë të madh në Bruksel, Berlin, Paris dhe çdo kund dhe kjo është mirë për rajonin”, ka thënë Ischinger.
Diplomati gjerman ka folur edhe rreth asaj nëse Kosova ka gabuar që s’ka shfrytëzuar administratën e Donald Trump për arritjen e një marrëveshje finale me Serbinë, qoftë me korrigjim të kufijve apo me shkëmbim territoresh.
Ischinger ka thënë se s’është i sigurt nëse ideja e shkëmbimit të territoreve siç ishte prezantuar gjatë administratës së Donald Trump do të zgjidhte të gjitha problemet në mes të Kosovës dhe Serbisë. Ai thotë se të ndryshuarit e kufijve është një çështje tepër delikat dhe s’mjafton që të pajtohen vetëm liderët e 2 shteteve.
Ish-ambasadori gjerman ka thënë se është skeptik që çështjet që janë diskutuar gjatë administratës së Trump do të çonin në një stabiltet të përhershëm. Ai ka thënë se mbetet skeptike për atë përpjekje dhe potencon se duhet gjetur një mënyrë tjetër për të ecur përpara tani, ndryshe nga ajo çfarë ka propozuar Administrata Trump.
“Nuk jam i sigurt nëse ideja e shkëmbimit të territoreve siç ishte prezantuar para disa vitesh gjatë kohës së Trump, do të zgjidhte të gjitha çështjet. Të ndryshosh kufijtë është një çështje shumë delikate dhe do të funksionojë në drejtim të paqes dhe stabilitetit të përhershëm vetëm nëse pajtohen të gjithë. Jo vetëm dy liderët, popullata e afektuar në zonat që ju po flisni. Këto janë çështje delikate. Unë jam skeptik nëse çështjet që janë diskutuar gjatë kohës së Trump do të çonin drejt një stabiliteti të përhershëm, nuk jam shumë i sigurt. Mbes skeptik dhe mendoj se ne duhet të gjejmë një mënyrë tjetër përpara, një mënyrë ndryshe nga ajo se çfarë administrata Trump ka propozuar”, ka thënë Ishcinger.
Tutje, ai ka thënë se Kosova duhet të zgjidh çështjen e Asociacionit dhe ta heq qafe si problematikë, meqë e njëjta ka qenë dhe vazhdon të jetë burim i trazirave të mundshme.
Ischinger thotë se për idenë e shkëmbimit të territoreve ka qenë skepktik, megjithatë thotë se ideja e krijimit të një regjimi të veçantë për komunat në veri i duket si diçka e rëndësishme.
Ischinger këtë e thotë duke potencuar se e kupton vështirësitë dhe rreziqet që kjo çështje ka brenda. Megjithatë thotë se çështja e Asociacionit duhet të zgjidhet dhe jo të fshihet prapa shpinës, raporton Gazeta Express.
“Mendoj që kjo çështje duhet të zgjidhet. Kjo është një nga pjesët më të vështira të asaj që është trashëguar. Unë përsëris që s’jam aq shumë në favor, sepse gjithmonë kam qenë skeptik për idenë e shkëmbimit të territoreve, por ideja e krijimit në një farë forme e një regjimi të veçantë për komunat në veri, më duket si e rëndësishme, gjithashtu kuptoj vështirësitë dhe rreziqet e përfshira, por mendoj që është e rëndësishme që çështja të trajtohet dhe të mos vendoset prapa shpinës. Duhet të zgjidhet, sepse është një burim, ka qenë dhe do të vazhdojë të jetë burim i trazirave të mundshme dhe vështirësive për qytetarët e Kosovës dhe ju keni nevojë ta hiqni qafe atë”,
ka thënë Ischinger në Pressing T7.
