Partia Socialdemokrate të premten para hyrjes së Kuvendit me një aksion simbolik shprehu pakënaqësinë ndaj punës së legjislativit, duke e cilësuar atë institucion jo demokratik, raporton InLajmi.
Duke vënë kritika ndaj punës së Kuvendit, anëtari i PSD-së Nol Nushi, përmend edhe mos seriozitetin e ligjvënësve derisa anashkaluan diskutimin për Projektligjin për faljen e gjobave të shqiptuara gjatë pandemisë.
“E vonuan, e zvarritën, por nuk arritën ta ndalin. Peticioni i nënshkruar nga mbi 11 mijë qytetarë, ku kërkohet inicimi i ligjit për faljen e gjobave të pandemisë, tash së fundi kaloi të gjitha procedurat burokratike, por jo edhe lejimin e pjesëmarrjes në seancë ku diskutohet dhe votohet kjo temë”, tha Nushi duke theksuar dekurajuese qasjen e Kuvendit në këtë drejtim.
“Është dekurajuese qasja e Kuvendit, përkatësisht kryeparlamentarit Konjufca, për qytetarët që kanë nevoja dhe organizohen rreth çështjeve në interes për ta. Demokracia përfaqësuese është më e gjerë sesa formaliteti i shtruar në institucione”, u shpreh Nushi, ndërsa për shpërfilljen e projektligjit, thotë se deputetët janë kapur pas pushtetit.
“Ligji e mundëson, deputeti e refuzon. Në vend se të nxiten iniciativat e tilla dhe të mbrohen direkt nga qytetarët, frika e pushtetit zuri ulësen e tyre. Këta përfaqësues janë të kapur ngushtë pas pushtetit të tyre”.
Gjatë performancër kritikuese të punës së legjislativit, përfaqësuesit e PSD-së vendosen edhe mbishkrimin në dyert e institucionit “Kuvend Jodemokratik” “Bunker Kuvend”/InLajmi/.
