Analisti dardan sejdiu, ka thënë se është skeptik se në muajt në vijim do të ketë ndonjë marrëveshje në mes Kosovës e Serbisë.
Ai tha se është skeptik edhe se Qeveria Kurti do të pranojë marrëveshjen që sillet në tavolinë, për shkak, siç tha ai, të ofertës së dobët.
“Për këtë mendoj për shkak të ofertës së dobët që e kemi në tavolinë. Mendoj se oferta që po na sillet në tavolinë nuk ka asgjë përtej asaj që kemi pasur në tavolinë në 2017-tën, 2019-tën, dhe mendoj se Kurti do të bënte një kthim për pozicionin e tij që e ka ndërtuar deri tash, që është goxha i fortë e goxha i mirë karshi dialogut me Serbi”, është shprehur Sejdiu në Rubikon në Klan Kosova.
Tutje, Sejdiu tha se Kurti do të vazhdojë të qëndrojë në teh të së mundshmes karshi dialogut me idenë, që sipas tij, të arrijë maksimumin e mundshëm në këtë situatë.
“Rrethanat kanë ndryshuar rrënjësisht, këtë e kupton gjithkush që merret pak me politikë, jo veç me konsiderimin që Kosova është qendra e botës por edhe me konsiderata rajonale të cilat edhe stabilitetin të cilin e dëgjon në secilin fjali të Escobar, Departamentit të Shtetit e çdo zyrtari pak më të lartë të sigurisë kur flasin për siguri dhe stabilitet në Ballkanin Perëndimor si një lloj parakushti për stabilitet në Evropë”, është shprehur Sejdiu, njofton Klankosova.tv.
