Shqipëria dhe Serbia janë 2 shtetet e rajonit, që kanë pasur ngadalësimin më të lartë të ekonomisë në 3 mujorin e 2-të të vitit, sipas raportit të fundit të Komisionit Europian për vendet kandidate dhe potencial kandidate.
Sipas raportit, rimëkëmbja ekonomike në Ballkanin Perëndimor vazhdoi të zbutet në tremujorin e dytë të 2022. Megjithëse ngadalësimi ishte më i butë se në tremujorin e parë dhe rritja mbeti në përgjithësi e lartë. PBB-ja e rajonit u zgjerua me 4.2% me bazë vjetore, krahasuar me 4.8% në tremujorin e mëparshëm. Ngadalësimi u shkaktua kryesisht nga një ecuri më e dobët në Shqipëri dhe Serbi.
Në Shqipëri, rritja reale e PBB-së u ngadalësua në 2.2% nga 6.5% në3 mujorin e mëparshëm, për shkak të tkurrjes së investimeve dhe konsumit publik. Pjesërisht kjo shpjegohet dhe nga baza e lartë në të njëjtën periudhë të një viti më parë. Megjithatë, konsumi privat dhe eksportet kanë mbetur të forta dhe kanë qenë nxitësit kryesorë të rritjes.
Në Serbi, rritja vjetore e prodhimit u ngadalësua në 3.9%, nga 4.3% në 3 muajt e mëparshëm, pasi rritja e qëndrueshme në konsumin e familjeve dhe publike, si dhe kontributet më të moderuara të investimeve dhe inventarëve, u kompensuan nga kontributi negativ i eksporteve neto.
Në Kosovë, rritja reale e PBB-së u zbut në 2.1% me bazë vjetore në 3 mujorin e 2-të të 2022, kryesisht për shkak të konsumit më të ulët të qeverisë dhe rënies së formimit bruto të kapitalit fiks, duke reflektuar tkurrjen e investimeve publike. Rritja është mbështetur në konsumin e familjeve dhe eksportet e mallrave, kombinuar me zgjerimin e fortë të eksporteve të shërbimeve.
Në të kundërt, rritja ekonomike në Mal të Zi u përshpejtua ndjeshëm në 3mujorin e 2-të të 2022 në 12.7% në vit, nga 7.1% në 3 mujorin e mëparshëm. Ai u nxit kryesisht nga konsumi privat, si rrjedhojë e rritjes së pagave neto reale pas heqjes së kontributeve shëndetësore dhe rritjes së pagës minimale si dhe nxitjes së mëtejshme të punësimit, që u ndikua nga rimëkëmbja e turizmit.
Gjithashtu në Maqedoninë e Veriut, ekonomia u rrit lehtë në 2.8% në vit, nga 2.4% në 3 muajt e mëparshëm, e ndikuar nga një rritje e investimeve, pjesërisht për shkak të efekteve bazë, dhe përmirësimi i konsumit privat.
Në Bosnje dhe Hercegovinë, rritja reale e PBB-së u përshpejtua lehtë në krahasim me nga 3 muajt e mëparshëm në 5.9%t, e nxitur kryesisht nga konsumi dhe investimet e familjeve, shkruan Aabcnews.al.
Në tërësi, PBB-ja e rajonit të Ballkanit Perëndimor u rrit me 4.2% në 3 mujorin e 2-të të 2022, nga një normë mesatare rritjeje prej 4.8% në 3 muajt e mëparshëm.
