Ministrja e Punëve të Jashtme dhe Diplomacisë, Donika Gërvalla – Schwarz, në fjalimin e saj të djeshëm në Këshillin e Sigurimit të OKB-së, ndër të arriturat e Kosovës që ka përmendur, ka folur edhe për pengesat nga Serbia që po i bëhen Kosovës.
Ndër të tjerash, Gërvalla ka folur edhe për procesin e zëvendësimit të targave të veturave me targa ilegale në ato RKS, duke thënë se jemi afër përfundimit të afatit për regjistrimin e veturave që kanë qenë të pajisura me targa ilegale serbe.
Në fjalën e saj, ministrja ka deklaruar se tashmë 90 % e pronarëve të veturave kanë zëvendësuar tabelat e paligjshme të automjeteve me ato të ligjshme.
“Kosova do të aplikojë edhe për anëtarësim në BE këtë vit dhe aspirojmë të jemi anëtarë të NATO-s. Më duhet t’i përgjigjem disa kërcënimeve serioze paqes dhe stabilitetit në rajon. Vuçiq po kërcënon në fund të tetorit vendin tonë. 90% të pronarëve të veturave kanë zëvendësuar tabelat e veturave të paligjshme me ato të ligjshme. Është gjë krejt e thjeshtë, nëse keni veturë, duhet të keni sigurimin dhe tabelat e ligjshme. Serbët ekstremistë po ndjekin e frikësojnë bashkëqytetarët e tyre që kanë ndërruar këto tabela. Është gabim që UNMIK po i shmang këto fakte”, tha Gërvalla.
Në këtë kontekst, duket se ministrja Gërvalla realisht ka gabuar kur ka përmendur përqindjen e automjeteve që janë pajisur me targa të ligjshme të Kosovës.
Kjo pasi në Kosovë llogaritet të jenë afër 9000-10.000 vetura me targa ilegale, e që shumica prej tyre gjenden në komunat me shumicë serbe.
Nëse deri më tani janë regjistruar me targa RKS 90% e këtyre automjeteve, i bie të jenë regjistruar rreth 8 mijë apo 9.000 automjete.
E këtë shifër e hedh poshtë edhe Ministria e Punëve të Brendshme, e cila në një përgjigje për lajmi.net ka bërë të ditur se faktikisht deri më tani me targa RKS janë regjistruar vetëm 12 automjete në komuna të ndryshme.
“Prej kur ka filluar regjistrimi i automjeteve, deri sot janë regjistruar 12 automjete me targa legale RKS nga targat ilegale. Regjistrimet janë bërë në komuna të ndryshme. Nga Regjioni 06 kemi 4 automjete, nga regjioni 02 kemi 4 automjete, nga regjioni 04 kemi 2 automjete dhe nga regjioni 01 kemi 2 automjete”, kanë deklaruar nga MPB.
Në përgjigjen e dërguar, kjo ministri ka përmendur edhe propagandën që sipas tyre vjen direkt nga Serbia rreth çështjes së legalizimit të targave.
“Siç e dini, rasti në Leposaviq është shoqëruar me incident pasi pronarit të automjetit të regjistruar me targa RKS, që është pjesëtar i Policisë së Kosovës, i është djegur një pjesë e shtëpisë të njëjtën ditë. Që nga dita e parë në të gjitha qendrat ka pasur interesim të qytetarëve, por duhet të theksojmë se në veri përkundër interesimit të qytetarëve shihet se ka një propagandë e cila vjen direkt edhe nga Serbia dhe fatkeqësisht ne kemi një incident, do të thotë vetura e parë që është regjistruar në veri, një rreshter policor i Kosovës ka bërë kthimin në targa RKS dhe të njëjtit në orët e mbrëmjes i është sulmuar shtëpia, i është djegur një pjesë e saj, dhe kjo padyshim ka për qëllim frikësimin e qytetarëve të kësaj ane. Rasti tjetër është kur një tjetër qytetari serb iu dogj depo, një ditë pasi djali i tij bëri regjistrimin e veturës”, thuhet nga MPB.
Nga kjo ministri kanë deklaruar se qytetarët në veri janë duke u frikësuar dhe kërcënuar direkt nga grupet ilegale kriminale të cilat jo vetëm që po udhëhiqen por edhe po financohen nga Vuçiq e të cilët kanë për qëllim destabilizmin e vendit dhe intimidimin e qytetarëve tanë në veri.
“Thirrjet për mos regjistrim të veturave nga ana e Vuçiq që iu bën qytetarëve tanë në veri i konsiderojmë si ftesë për luftim të rendit, ligjit dhe institucioneve të Republikës së Kosovës. Si Ministri e Punëve të Brendshme ne jemi të përkushtuar dhe të pa kompromis që të përfundojmë me sukses këtë proces, duke iu bërë thirrje edhe qytetarëve që të raportojnë çfarëdo kërcënimi që ata mund të kenë nga strukturat e ndryshme kriminale që të mos i regjistrojnë veturat e tyre në targa RKS. Dritarja e mundësisë është e hapur deri në fund të muajit. Fushata jonë për informim sa më të gjerë po vazhdon. Ministri Sveçla së fundmi i është adresuar komuniteti serb edhe në gjuhën serbe me qëllim që komunikimi të jetë i drejtpërdrejt. Gjithashtu, tani e tutje të gjithë qytetarët mund të regjistrojnë automjetet e tyre me targa të rajonit që i përkasin, në të gjitha qendrat e regjistrimit të automjeteve, pavarësisht nga vendbanimi i tyre në Republikën e Kosovës”, kanë deklaruar nga MPB për lajmi.net.
Kujtojmë se fushata e informimit rreth regjistrimit të targave në RKS është duke vazhduar në mënyrë intensive nga institucionet, por nuk dihet nëse kjo fushatë po ka sukses duke marrë parasysh numrin e vogël të qytetarëve që kanë pranuar t’i regjistrojnë automjetet e tyre me targa RKS.
