Në kuadër të Muajit të luftës kundër kancerit të gjirit, Presidentja e Kosovës Vjosa Osmani vizituar Klinikën e Onkologjisë, e cila tha se prioritet i agjendës së saj është shëndetësia, raporton InLajmi
Presidentja Osmani, pas vizitës para gazetarëve vuri në pah se prioritet i saj mbetet shëndetësia sikur që kërkoi rritjen e buxhetit për këtë sektor.
Derisa foli për shëndetësinë si tërësi, Osmani u ndal tek nevojat e Klinikës së Onkologjisë, aty ku trajtohen sëmundjet e kancerit, për çka tha ajo se duhet të angazhohemi për përmirësimin e kushteve për pacientët dhe stafin mjekësor.
“E shfrytëzuam këtë bisedë për të diskutuar për nevojat që i ka kjo Klinikë, në mënyrë që të përmirësoheni kushtet për të gjithë pacientët sepse kujdesi i stafit mjekësor është i jashtëzakonshëm. Në të njëjtën kohë duhet kushte më të mira dhe për këtë po bëjmë maksimumin që këto kërkesa të merren parasysh”, u shpreh presidentja.
Përveç trajtimit shëndetësor, presidentja theksoi nevojën e mbështetjes psikologjike për pacientët që trajtohen në Klinikën Onkologjike.
“Këta pacientë kanë nevojë edhe për përkrahje psikologjike, ku diskutuam edhe për rritjen e numrit psikolog klinik këtu sepse kanë nevojë për mbështetje të madhe emocionale”, tha e para e shtetit Osmani, teksa ka kërkuar që në buxhetin e vitit të ardhshëm të ndahet buxhet më i madh për shëndetësinë.
Nga ana tjetër u.d e drejtoreshës së SHSKUK-së, Pranvera Zejnullahu-Raçi, theksoi angazhimin dhe punën voluminoze që bëhet në të gjitha shërbimet e kujdesit terciar, ndërsa vuri theksin tek shërbimet onkologjike.
“Muaji tetor është muaji kur merr publicitet më të madh, por ne jemi në luftë çdo ditë për të parandaluar, por edhe për të mjekuar dhe trajtuar pacientët me sëmundje malinje”, Zejnullahu-Raçi
Në ditën kur Onkologjinë e vizitoi Presidentja Osmani, në këtë institucion spitalor u shpërndanë 100 proteza silikoni e 100 gjoksore, projekt i mbështetur nga Presidenca e Republikës së Kosovës, si dhe 100 paruke, donacion i Koalicioni K10 dhe Fondi për Popullsi i Kombeve të Bashkuara UNFPA Kosova, zyra në Prishtinë.
