Komisioni për Integrim Evropian ka mbajtur tryezë me temën: “Agjenda Evropiane 2022”, ndërsa u vu theksi tek Raporti i Komisionit Evropian për Kosovën dhe për progresin integrues që ka shënuar Kosova, raporton InLajmi
Në diskutimin e tij, zëvendëskryeministri, Besnik Bislimi, ka përsëritur se nuk duhet anashkaluar vlerësimin pozitiv në Raportin e KE-së, ku është theksuar se nuk ka ndërhyrje politike në asnjë institucion.
Tutje, ka shtuar ai se me vlerësimet pozitive nga KE-, faktohet se pavarësisht shumë sfidave Qeveria ka arrit t’u jap zgjidhje disa problemeve të kërkuara nga BE-ja.
Zëvendësshefi i ekzekutivit, gjithashtu tha se nuk ka fare dyshime se në vend është shënuar rritje ekonomike dhe rritje e punësimit
“Është një shifër e dokumentuar. E njëjta vlen edhe për punësimin, për arsye se shumë herë po thuhet nuk po duken vendet e punës. Vendet e punës nuk ekspozohen në shesh për me i pa, por janë pjesë e publikimit të statistikave”, tha Bislimi duke shtuar se ka lista të bizneseve që dëshmojnë se ka shtim për 35.000 vende të reja të punës
“Kujtdo që i intereson, unë e kam listën e të gjitha 71 mijë bizneseve në Kosovë për secilin prej tyre sa vende të punës i ka shtuar që nga viti 2020 deri në vitin 2021 dhe mund të themi saktë se ku janë këto 3.000 vende të punës edhe me regjione. Shifrat ekzistojnë dhe janë edhe të qasshme për publikun”, tha ai.
Kryetarja e Komisionit për Integrim Evropian Rrezarta Krasniqi, tha se viti 2022 është i rëndësishëm për procesin integrues për vendin dhe shprehet e shqetësuar për stërzgjatjen e procesit të liberalizimit të vizave për Kosovën krahasuar me vendet tjera të Ballkanit .
“Viti 2022 është një viti i rëndësishëm për procesin integrues për Kosovën. Pas 10 vjetësh dialog për liberalizimin e vizave të gjithë qytetarët i kanë kthyer sytë ka vendet që vendosin për këtë. Procesi për liberalizim të vizave për Kosovën ka thyer të gjitha rekordet e kohëzgjatjes”, tha Krasniqi.
Demush Shasha, drejtor ekzekutiv i EPIK, ka theksuar se në procesin integrues, Kosova dhe Bosnja e Hercegovina janë 2 vende që kanë mbetur prapa, krahasuar me vendet tjera të Ballkanit, që faktohet edhe në Raportin e tyre të Progresit.
“Secili vend përmes raportit ka marr një notë sa i përket shëndetit të tij, për tu anëtarësuar më BE brenda secilës nga këto 33 fusha. Ballkani ndahet në dy pjesë një pjesë janë 4 vende që janë mjaftë përpara ndërsa dy vende janë prapa”, tha Shasha.
