Kryeshefja ekzekutive e Korporatës së Sfidave të Mijëvjeçarit, MCC, Alice Albright, njëherësh vajza e ish-sekretares amerikane Madeleine Albright, të marten mori pjesë në ceremoninë e përurimit të rinovimit të 3 soliterëve në lagjen Ulpiana në Prishtinë, raporton InLajmi.
Derisa foli për projektet dhe bashkëpunimin që ka MCC me vende të ndryshme të botës, znj.Albright rast kujtoi se me Kosovën MCC bashkëpunimin e ka filluar në vitin 2017 duke investuar 49 milionë euro.
“Që nga viti 2004 MCC në bashkëpunim me 40 shtetet e botës i kanë ndihmuar gjithë andej në botë. MCC me Kosovën ka bashkëpunuar që nga viti 2017 kur kemi bërë nënshkrimin e marrëveshjeve, me Kosovën kemi punuar bashkërisht në furnizim në energji elektrike, në sundim të ligjit”, tha Albright.
Pjesë e ceremonisë së përurimit ishte edhe ambasadori i SHBA-ve, Jeffrey Hovenier, premtoi se SHBA-të do ta ndihmojnë Kosovën për tejkalimin e krizës energjetike.
“Siç e dini kriza e energjisë që po ndodhë në botë është duke ndodhur edhe në Kosovë”, tha Hovenier, prandaj premtoi ndihmën në tejkalimin me lehtësi të problemeve energjetike.
“SHBA ka qenë dhe janë faktorët kyç në ndihmën që i bëjnë Kosovës në energji. Investimet e tilla janë të nevojshme në këtë kohë”, theksoi ambasadori amerikan.
“Natyrisht SHBA është duke ndihmuar Kosovën. Këtu kemi një partneritet të fuqishëm, shpresojmë që banorët do ta ken një dimër më të ngrohtë”, tha ministrja e Ekonomisë, Artane Rizvanolli, ndërsa theksoi se SHBA-ja mbetet faktor kyç i bashkëpunimit në fushën e energjisë.
Kryetari i Prishtinës, Përparim Rama,ndërsa foli për rinovimin e 3 soliterëve, kujtoi se ndërtesat në fjalë ashtu siç kanë qenë kanë përbërë rrezik për jetën e qytetarëve.
“Kemi një ditë me rëndësi të madhe, për një kohë të madhe këto ndërtesa kanë qenë me një pamje të keqe dhe me rrezikshmëri për qytetarët”, tha Rama, ndërsa theksoi se rinovimi i objekteve të banimit kolektiv do të vazhdojë edhe në lagje të tjera të kryeqytetit
Petrit Selimi, kryeshef i Fondacionit të Mileniumit të Kosovës MFK, foli për projektin dhe investimet në këto ndërtesa dhe në gjithë Kosovën, ku theksoi se shumë shpejt do të përfundojnë punimet rreth rinovimit të tre soliterëve, por do të vazhdohet edhe me projekte të tilla edhe në pjesë tjera./InLajmi/
