Ministrja e Arsimit, Shkencës, Teknologjisë dhe Inovacionit, Arbërie Nagavci, këmbëngulë që mësimi i humbur gjatë grevës së mësimdhënësve të zëvendësohet duke punuar ditëve të shtuna, edhe pse të shtunën e parë kur edhe u mor vendimi pjesëmarrja e nxënësve në mësim nuk ka qenë e kënaqshme, raporton InLajmi.
Mos realizimi i plotë i procesit mësimor të shtunën, sipas ministres Nagavci është pasojë e presioneve nga më të ndryshmet.
“Mendoj se kjo ditë e shtunë për arsye të ndryshme nuk është arritur të realizohet 100 për qind sipas planifikimit, besoj edhe pak për shkak të mungesës së i formimit nga ana jonë por edhe për shkak të hutisë nga deklaratat e ndryshme që janë krijuar apo edhe tensioneve që i kanë pasur prindërit. Vend për rishikim më nuk ka dhe bëj apel edhe tek prindërit e mësimdhënësit që të organizohemi për të kompensuar të gjitha humbjet e shkaktuara tek nxënësit”, tha Nagavci, duke shtuar se mësimi duhet të vazhdojë sipas planit të MASHTI dhe se mënyrë tjetër nuk ka.
Ministrja, ndërkaq ka hedhur kritika ndaj Këshillit të Prindërve, ndërsa thekson se deklaratat e tyre janë të pamatura.
“Situata ka dalluar nga komuna në komunë e prej shkollës në shkollë dhe aty ku informatat kanë qenë të mira, mësimi ka vazhduar. Përfaqësuesit e Këshillit të Prindërve me deklaratat e tyre shpesh të pamatura dhe të paqëndrueshme dhe konsideroj se kanë një nguti dhe i lus ata që po thirren në emër të Këshillit të Prindërve që të kenë në radhë të parë interesin më të mirë të fëmijëve”, tha Nagavci.
