Deputetja e Grupit Parlamentar të LVV, Fitore Pacolli ka komentuar zhvillimet e fundit në vend, me theks për procesin e liberalizimit të vizave, raporton, InLajmi.
Pacolli ka thënë se nga Komisioni Evropian ka vlerësuar punën e Institucioneve dhe se raporti i tanishëm është më i mirë se ato të viteve të kaluara.
“Nga viti 2008 Komisioni Evropian çdo vit ka vlerësuar punën e institucioneve të Kosovës, nga 14 raporte ky është raporti më i mirë në raport me ato të viteve të kaluara dhe më i miri në raport me vendet e rajonit”, ka deklaruar Pacolli.
Për të njëjtën gjë, Pacolli ka shtuar se është raporti i parë ku nuk evidentohen shumë progres.
“Ky është edhe raport i parë ky nuk evidentohen ndërhyrje politike dhe ndikim politik në sistemin e drejtësisë, administratës publike, transmetuesin publik dhe në agjencione e pavarura. Ky është raporti i parë ku evidentohet shumë më shumë progres. Sa i përket punës së Kuvendit edhe këtë vit është evidentuar se Kuvendi është ndikuar nga një atmosferë e polarizuar politike dhe me vështirësi për të siguruar kuorume”, tha Pacolli.
Deputetja Pacolli, po ashtu ka përmendur numrat e ligjeve të miratuara nga Kuvendi i Kosovës dhe të marrëveshjeve ndërkombëtare.
“Nga qershori i vitit 2021 deri në qershor të vitit 2022, Kuvendi ka miratuar 123 ligje në mesin e tyre 31 marrëveshje ndërkombëtare ndërsa në vitet e kaluara më së shumti kanë qenë të miratuara 53 ligje” tha Pacolli.
Tutje, Pacolli ka shtuar se Kuvendi ka thyer rekord me numrin e ligjeve të miratuara dhe marrëveshjeve ndërkombëtare.
“Kuvendi gjatë periudhës raportuese ka thyer rekordin me numrin e ligjeve të miratuara, marrëveshjeve ndërkombëtare të ratifikuara dhe nismave legjislative. Matja e suksesit të punës së kuvendit bëhet përmes rezultateve që jepen në fund, me numrin e ligjeve të miratuara”, ka deklaruar ajo.
Këto çështje deputetja e LVV, Fitore Pacolli i bëri gjatë një konference për media, teksa ishte e shoqëruar nga partiaku i saj, Armend Muja./InLajmi/
