Anëtari i Lidhjes Demokratike Xhafer Tahiri, ka kritikuar qeverinë për shfrytëzimin e rastit që ka për ta arritur liberalizimin e vizave, raporton Inlajmi.
Derisa ka kritikuar qeverisjen aktuale, ka thënë se ekzekutivi i vendit nuk ka strategji për poltikën e jashtme.
“Më shqetëson fakti nëse Qeveria nuk ka pasur informacion mbi kërkesat e reja të shteteve anëtare të BE-së, qoftë kërkesa teknike. Qeveria jonë nuk ka zhvilluar mjaftueshëm dialog me vendet anëtare veç e veç por po ashtu vërteton se Qeveria është pa strategji në politikën e jashtme. Qeveria duhet t’i marrë obligimet e saj dhe të garantojë se mund t’i përmbushë obligimet e saj. Qeveria e Kosovës duhet ta shfrytëzojë momentumin historik, edhe të luftës në Ukrainë, dhe të liberalizohen vizat për qytetarët e Kosovës”, tha ai.
Për më tepër Tahiri, theksoi se shansin e qytetarëve për viza ua humbi Lëvizja Vetëvendosje.
“Është kjo Qeveri, kjo shumicë që më 2016 e bllokoi liberalizimin, sot është fat që në Kosovë nuk kemi asnjë parti politike që kundërshton përmbushjen e kritereve për liberalizim të vizave siç ishte më 2016 kur VV-ja ia humbi këtë rast qytetarëve”, u shpreh Tahiri,të premtën në konferencë për media.
