Kryeministri i Shqipërisë, Edi Rama, ka folur të mërkurën në Këshillin e Evropës, aty ku do të paraqitet rezoluta kundër pretendimeve të Dick Martyt për UÇK-në.
Kryeministri shqiptar, vazhdoi me fjalimin e tij, ndërsa theksoi se aty është jo vetëm për ta përfaqësuar Shqipërinë, por edhe Kosovën.
“Ju jam mirënjohës për mundësinë për t;’iu drejtuar kësaj asambleje për një çështje thelbësore të drejtësisë. Unë përfaqësoj Shqipërinë, por nuk kam ardhur këtu të flas vetëm për të. Tema e shqetësimit që dua të ndaj me ju lidhet me Shqipërinë si trupi me shpirtin. Ajo që do them lidhet me rolin që Europa dhe institucionet luajnë sesi i zhvillojnë këto marrëdhënie. Ta kthesh një histori konflikti në një histori bashkëpunimi kërkon një besim tek institucionet ndërkombëtare. Marrëdhëniet tona me njëri tjetrin ndërmjetësohen nga institucionet ndërkombëtare. Dëmi shkon shumë larg, përtej tragjedive individuale”, deklaroi Rama.
Ndërsa ka folur për përjetimet e luftës në Kosovë, tha se kujtimet e dhimbjet tona nuk janë kujtime të vjetra.
“Për ju lufta është kujtim i largët, për ne është plagë që ende dhemb. Faktet nuk duhet të cenohen nga lojërat e pushtetit. Në dekadat e fundit institucionet kanë qenë thelbësore në zgjidhjen e konflikteve. Serbia jo shumë kohë më parë konsiderohej si armik për vdekje, por tashëm është një partner I rëndësishëm në nismën tonë të Ballkanit të Hapur. Europa për ne është më shumë sesa një projekt, është projekt. Asnjëherë më parë historia nuk është treguar më e mirë me ne. Të tjerët vendosnin për ne, perandoritë, regjimet dhe ideologjitë, që na mbajtën të kyçyr larg Evropës për një vend”, u shpreh kryeministri i Shqipërisë Edi Rama.
Rama, gjithashtu kujtoi kohën e transformimit të Shqipërisë tash e tri dekada, ndërsa theksoi se e ardhmja e shtetit që ai drejton është në Europë, transmeton Top Channel.
“Tri dekada më parë patëm mundësi të ndryshonim fatin tonë. Besimi i Shqipërisë në fatin europian është spiranca jonë drejt së ardhmes. Besimi i Shqipërisë në Europë është e ardhmja jonë, pavarësisht shtrëngata që has Europa, shqiptarët nuk përfytyrojnë asgjë tjetër përveç se këtë rrugëtim, prandaj ushqejmë shpresë. Ka politikanë që duan të shfrytëzojnë të shkuarën, që çështjet e së vërtetës dhe drejtësisë dalin në pah, besimi në institucionet kombëtare duhet rivënë në vend”, tha Rama.
