Ministri i Ministrisë së Mbrojtjes së Republikës së Kosovës, Armend Mehaj, thotë se synimi ynë është që ushtria e Kosovës të jetë e pajisur me armatimet më moderne ushtarake për të qenë e gatshme për të përballuar të gjitha sfidat e sigurisë, përcjell Inlajmi.
Shefi i mbrojtjes, thekson se ndryshimi i rrethanave gjeopolitike, avancimin e teknologjisë sikur edhe avancimi i bashkëpunimit me shtetet aleate, shprehet nevoja përveç ngritjes në aspektin profesional ashtu edhe e ngritjes së investimeve në pajisje ushtarake.
Mehaj ka bërë të ditur se gjatë vitit 2021 Ministria e Mbrojtjes ka investuar në armatim 96 për qind më shumë se sa në vitin 2019.
Postimi i tij i plotë:
Në panairin vjetor të Asociacionit të Ushtrisë së Shteteve të Bashkuara të Amerikës, takuam përfaqësues të kompanive më të njohura prodhuese të pajisjeve ushtarake, si dhe po ashtu u njoftuam me zhvillimet më të fundit teknologjike në këtë fushë përmes prezantimeve informuese si dhe paneleve të diskutimit mbi tema ushtarake dhe të sigurisë kombëtare.
Me ndryshimin e kushteve gjeopolitike, avancimin e teknologjisë, avancimin e bashkëpunimit me shtetet aleate, ngritjen e aspektit profesional të ushtrisë, jemi të interesuar që proporcionalisht të ngrisim edhe nivelin e investimit me pajisje ushtarake.
Gjatë vitit 2021 kemi investuar në këtë drejtim 96% më shumë sesa në vitin 2019, ndërsa deri në fund të këtij viti pritet që investimi të jetë 99% më i lartë.
Synimi ynë është që ushtria e Republikës së Kosovës të jetë e pajisur me armatimet më moderne ushtarake, e gatshme për të përballuar të gjitha sfidat e sigurisë.
