Moska nuk do ta refuzojë një takim mes Presidentit Vladimir Putin dhe homologut të tij të SHBA-së, Joe Biden në takimin e G20 muajin e ardhshëm, tha ministri i Jashtëm Sergei Lavrov.
Moska ishte e hapur për bisedime me perëndimin për luftën në Ukrainë, por ende nuk kishte marrë ndonjë “ofertë serioze” për të negociuar, tha Lavrov në një intervistë për televizionin shtetëror rus.
Ai tha se zyrtarët amerikanë, përfshirë zëdhënësin e sigurisë kombëtare të Shtëpisë së Bardhë, John Kirby, kishin thënë se SHBA ishte e hapur për bisedime, por Rusia kishte refuzuar.
Lavrov tha:“Kjo është një gënjeshtër. Nuk kemi marrë ndonjë ofertë serioze për të kontaktuar”.
Ai shtoi se Rusia ishte e gatshme të dëgjonte çdo sugjerim në lidhje me bisedimet e paqes: E kemi thënë vazhdimisht se nuk i refuzojmë asnjëherë takimet. Nëse ka një propozim, atëherë do ta shqyrtojmë.
Duke folur për mundësinë që Turqia të mund të presë bisedimet midis Rusisë dhe perëndimit, Lavrov tha se Moska do të ishte e gatshme të dëgjonte çdo sugjerim, por nuk mund të thoshte paraprakisht nëse kjo do të çonte në rezultate, shkruan Abc.news.al.
Ai tha se presidenti i Turqisë, Recep Tayyip Erdogan, do të ketë mundësinë t’i paraqesë propozime Presidentit Vladimir Putin kur të dy të vizitojnë Kazakistanin këtë javë.
