Zvarritja disa-vjeçare me procesin e liberalizimit të vizave pritet të marrë fund me 13 tetor. Presidenca çeke e Bashkimit Evropian e ka vendosur zyrtarisht në rend dite diskutimin për liberalizimin e vizave për Kosovën.
Përfshirja në agjendë po nënkuptohet edhe si vendim pozitiv për vendin tonë. Profesori i marrëdhënieve ndërkombëtare, Arben Fetoshi, është shprehur pozitiv në lidhje me vendimin që mund të merret.
Fetoshi këtë pohim e lidh edhe me reflektimin e Francës dhe Holandës.
“Më 13 tetor do të fillojë përmbyllja e një procesi tejet të zvarritur padrejtësisht ndaj qytetarëve të Kosovës. Përfshirja në agjendë nënkupton vendim pozitiv nëse kemi parasysh reflektimin e Francës dhe Holandës, derisa procedura do të marrë kohë në varësi të vullnetit politik të BE-së. Pra, nëse do të përdoret edhe më tutje si një mjet presioni në kuadër të dialogut, lëvizja e lirë mund të zvarritet edhe së paku gjashtë muaj, ndërkaq po të ketë vullnet mund të përshpejtohet. Megjithatë, e rëndësishme është se nuk mund të ketë më kthim prapa dhe se heqja e vizave do të marrë epilogun e duhur më së largu deri në pranverë”, deklaroi Fetoshi.
Edhe njohësi marrëdhënieve ndërkombëtare, Dorajet Imeri, po thekson se liberalizimi i vizave është gati .Imeri thotë se është shprehur një vullnet politik i shteteve kryesore dhe me me ndikim në BE, që qytetarët e Kosovës te mund të lëvizin lirshëm.
“Liberalizimi i vizave, duket se ështëe gati, pasi është shprehur një vullnet politik i shteteve kryesore dhe me me ndikim ne BE, që qytetaret e Kosovës të mund të lëvizin lirshëm. Kësisoj, liberalizimi duhet te shihet fillimisht si nje ndryshim i qasjes se BE-se ndaj Kosovës, e cila prej kohesh ka kryer obligimet e veta qe dalin nga ky proces. Si procedure, mund te jete e diskutueshme koha optimale per lëvizje te mire te qytetareve, pritshmeritë janë që ne fillimin e pranverës të mund të jetësohet kjo” deklaroi Imeri për “Gazeta Blic.
Qytetarët e Kosovës janë të vetmit nga 6 vendet e Ballkanit Perëndimor që nuk mund të lëvizin lirshëm në vendet e Bashkimit Evropian.
Megjithëse Kosova ka vite që i ka plotësuar kriteret, vendet si Franca e Holanda janë shprehur vazhdimisht skeptike. Por, disa ditë më parë, në një deklaratë të përbashkët të ministrive të jashtme të Gjermanisë, Francës dhe Polonisë, ata kanë bërë thirrje për progres në këtë çështje.
“Ne bëjmë thirrje për progres në lidhje me liberalizimin e vizave për Kosovën” thuhet ndër të tjera në komunikatën e tyre.
