Ish-ministri i Financave, Haki Shatri, ka deklaruar se ekzekutimi i pagave për mësimdhënësit është lajm i mirë, dhe sipas tij, ka qenë e lehtë gjetja e një zgjidhjeje për kërkesat e sindikatës së arsimit, sepse siç tha, qeveria i ka pasur mundësitë reale financiare.
Në emisionin Info Magazine në Klan Kosova, ai u shpreh se qeveria bëri një lloj kompensimi të pagës deri në nxjerrjen e ligjit për paga.
“Është lajm i mirë ekzekutimi i pagave. Unë po bashkëndjej me ata që kanë pritur 7-8 ditë për paga, sot i kanë gëzuar fëmijët e tyre dhe i kanë kryer obligimet që sigurisht janë të shumta, dhe është lajm i mirë, por në anën tjetër duket një lloj kryeneqësie e qeverisë për të vazhduar me retorikën e hershme më shumë se një muaj lidhur me kush ka faj e kush s’ka faj, pse ka faj, pse s’ka faj, dhe shmangja nga një veprim që do të ishte i mirëpritur nga gjithë opinioni i një bashkëbisedimi normal duke e respektuar palën në bashkëbisedim, cilado qoftë, dhe duke folur gjuhë shqipe pa përkthyes, pa nevojë të ndërmjetësuesve ndërkombëtarë, me gjet një zgjidhje që ka qenë shumë lehtë e mundur të gjendet, sepse mundësitë reale financiare i ka pasur qeveria jonë për ta plotësuar kërkesën e sindikatës për një shtesë 100 euro për katër muaj deri në vitin e ri, sepse kjo nuk është rritje, por është një kompensim për vlerën e humbur të parasë, të pagës të cilën e marrin jo vetëm punëtorët e arsimit, por të gjithë ata që paguhet me paga, dhe një lloj kompensimi i përkohshëm deri në nxjerrjen e ligjit për paga”, deklaroi ai.
