Drejtori ekzekutiv i Grupit Ballkanik për hulumtimin e politikave, Naim Rashiti ka thënë se nuk dihet autorësia e dokumenteve të ndryshme të cilat po qarkullojnë si një kornizë për procesinë e dialogut Kosovë-Serbi.
Rashiti në Politiko tha se Bashkimi Evropian, përkatësisht Gjermania si dhe SHBA-të, janë të interesuar që të ketë ide të reja nga njerëz me eksperiencë për dialogun.
“Nuk kemi dokument në tavolinë për marrëveshjen. Por, kemi kornizë, ose fjkalë të vendosura, ide nëpër dokumente për të ndërtuar procesin e dialogut. Në 2-3 dokumente përsëriten kjo ideja që të ketë marrëveshje në 2023, në vitin 2023 kur parashihet integrimi i Serbisë në BE, të ketë njohje eksplicite për Kosovën. Flitet për modele, që njëra palë të mos e bllokojë palën tjetër. Ato janë analiza që dikush i ka bërë, edhe i ka shpërndarë diku. Edhe vetëm kaq. Nuk dihet autorësia e tyre. Nuk e di a ka autorë vendor, ose autor të veçantë. Ka ide ose ka interes të Brukselit, të Gjermanisë e SHBA-ve që të ketë ide, nga njerëz me eksperiencë për të parë se çfarë mund të ushqehet kjo analizë”, tha Rashiti në Politiko.
