Shqipëria do të blejë nga Turqia dronë të armatosur Bayraktar. Këtë e ka konfirmuar Kryeministri Edi Rama në një intervistë për emisionin Opinion me gazetarin Blendi Fevziu nga Nju Jorku.
Rama tha se Shqipëria do të marrë 6 dronë ushtarakë të armatosur të cilët do të përdoren edhe për qëllime të tjera civile në vendin tonë.
Kryeministri Rama tha se kanë biseduar që Shqipëria duhet t’i ketë këtë dronë.
“Ne kemi biseduar për domosdoshmërinë e dronëve dhe jemi në procesin e përfundimit të marrëveshjes për të marrë edhe ne dronët Bayraktar, të cilët duke parë dhe rrjedhën e ngjarjeve do t’i marrim të armatosur, të cilët do t’i paguaj Shqipëria”.
Rama tha se këta dronë Turqia do t’i bëjë me një çmim të volitshëm.
Për qëllimet që kemi dhe për shërbimin që do të na bëjnë janë absolutisht me çmim të arsyeshëm, shkruan Klan Tv.
Pra do keni 6 dronë të armatosur që do jenë në funksion të forcave ushtarake shqiptare, dhe do të shërbejnë për qëllime civile, për kontrollin e territorit, për ndërtimet pa leje.
