Njësitë e Specializuara të Policisë së Kosovës kanë bastisur të mërkurën disa shtëpi në Prishtinë.
Operacioni policor i realizuar në disa prej lagjeve të kryeqytetit është vazhdimësi e operacionit të njohur si “Brezovica”.
Aksioni “Brezovica 6” është konfirmuar edhe nga Policia e Kosovës, ku ndër të tjera është theksuar se aksioni është duke vazhduar ende.
“Policia e Kosovës konfirmon se në bashkëpunim dhe koordinim me organet e drejtësisë ka vazhduar realizimin e operacionit policor “Brezovica 6”, ku informacionet dhe detajet rreth këtij operacioni do të bëhen të ditura pas përfundimit”, tha zëdhënësi i Policisë për Rajonin e Prishtinës Baki Kelani.
E lidhur me këtë është deklaruar edhe prokurori i rastit, Rasim Maloku, i cili ka konfirmuar se në aksionin “Brezovica 6” janë arrestuar 7 persona të dyshimtë.
Ai theksoi se deri më tani janë bastisur 8 lokacione, në Prishtinë, 2 në Podujevë dhe një në Fushë-Kosovë.
“7 persona janë arrestuar, ndërsa janë bastisur 11 lokacione të ndryshme të lidhura me rastin; tetë lokacione në Prishtinë, 2 në Podujevë dhe një në Fushë Kosovë. Një person nuk kemi arritur ta arrestojmë pasi që nuk e kemi gjetur aty”, tha Maloku.
Në kuadër të rastit të njohur si “Brezovica”, deri më sot në burgje janë 30 persona të dyshimtë.
Në mesin e këtyre 30 persona janë edhe shumë zyrtarë shtetërorë, të cilët dyshohet të jenë përfshirë në ndërtimet e 500 vilave e hoteleve në zonën e mbrojtur të maleve, përcjell Lajmi.net.
Kurse në aksionin e sotëm mediat kanë raportuar se deri tani janë arrestuar biznesmenë, por edhe asamblistë.
