Anëtari serb i presidencës së Bosnje Hercegovinës dhe lideri i Aleancës së Social-Demokratëve të Pavarur, Milorad Dodik deklaroi se Perëndimi është sjellë prej vitesh në mënyrë të paturpshme në Ukrainë, ndaj dhe Rusia u detyrua që të mbrojë njerëzit në Donbas.
Në një intervistë për Tass gjatë vizitës së tij në Moskë, Dodik u shpreh se vendet perëndimore nuk reaguan për shfarosjen e popullsisë ruse në Ukrainë.
“Për shumë vite Perëndimi nuk reagoi ndaj shfarosjes së popullsisë ruse në Ukrainë, çdo ditë kishte vrasje dhe bombardime në Donbas. Perëndimi kishte përgatitur një ofensivë kundër Luganskut dhe Donjeckut me forcat ukrainase, kishte trajnuar njësitë e tyre dhe dërgoi një numër të konsiderueshëm mercenarësh. E gjithë kjo ishte e qartë dhe Rusia u detyrua të hakmerret”, theksoi ai.
Rusia ka nisur pushtimin e paprovokuar të Ukrainës më 24 shkurt, shkruan Euronews.
Ukraina së fundmi ka nisur një kundërofensivë në Harkiv dhe deri më tani, Kievi pretendon se ka arritur të rimarrë 8.000 kilometra katrorë territor nga forcat ruse në këtë rajon.
