Qeveria e Kosovës në mbledhjen e së mërkurës ka miratuar Projektligjin për Institutin e Krimeve të kryera gjatë luftës në Kosovë, raporton InLajmi.
Para kabinetit qeveritarë Projektligji në fjalë e ka paraqitur ministrja e drejtësisë Albulena Haxhiu, e cila në këtë rast tha se verifikimi i të dhënave që dëshmojnë krimet e kryera ndihmojnë në përmbushjen së drejtave të viktimave por edhe shoqërisë për njohjen e së vërtetës.
Projektligji në fjalë është mbështetur unanimisht nga kabineti qeveritarë, ndërsa pak fjalë për këtë Projektligj i tha edhe kryeministri i vendit.
Ndërsa foli për të kaluarën dhe të drejtën për të zbardhur krimet dhe njohjen e së vërtetës, Kurti tha se vetëm duke respektuar të kaluarën mund të kemi një të ardhme të ndritur.
“Instituti i krimeve të kryera gjatë luftës do të themelohet në kuadër të Zyrës së Kryeministrit. Vetëm me respektimin e duhur të së kaluarës mund të kemi një të ardhshme të ndritur”, ka thënë Kurti. /InLajmi/
