Dorëheqjen e presidentit të Rusisë e kanë kërkuar një grup deputetësh. Bëhet fjalë për deputetët komunalë nga 18 rrethe në Moskë dhe Shën Petersburg, të cilët e kanë nënshkruar një deklaratë publike, përmes së cilës kërkojnë dorëheqjen e presidentit rus.
Në deklaratë thuhet se Putin po e dëmton Rusinë.
“Ne, deputetët komunalë të Rusisë, besojmë se veprimet e Presidentit Putin dëmtojnë të ardhmen e Rusisë dhe qytetarëve të saj. Kërkojmë dorëheqjen e Vladimir Putinit nga posti i Presidentit të Federatës Ruse”, thuhet ndër të tjera në deklaratë.
“Deputetët ende nuk e kanë të ndaluar të kenë mendim. Dhe gjithashtu nuk është e ndaluar të flitet për dorëheqjen e presidentit. Ai nuk është monark, por punëtor, merr rrogë nga taksat tona. Funksioni ynë është të përfaqësojmë interesat e popullit dhe ne shohim që populli nuk është i kënaqur. Dhe populli ynë është burimi i pushtetit sipas Kushtetutës. Unë personalisht nuk i kuptoj motivet e veprimeve të Vladimir Putin. Unë mendoj se ju nuk mund të jeni në pushtet për kaq gjatë”, ka thënë deputetja e rrethit Semenovsky.
Sakaq, ushtria ukrainase njoftoi se kishte rimarrë 500 kilometra katrorë territor nga forcat ruse në 2 javë kundërofensivë në rajonin Kherson.
“Sukseset tona në këto 2 javë janë mjaft bindëse,” u tha gazetarëve Natalia Gumenyuk, një zëdhënëse ushtarake për jugun, “ne çliruam rreth 500 km katrorë.” kryesisht komunitetet Visokopilia, Bilogirka, Soukhi, Stavok dhe Miroliubifka
Nga ana tjetër, Rusia tha se bombardoi zonat në rajonin e Kharkiv të Ukrainës (lindje) që u rimorën ditët e fundit nga forcat e Kievit gjatë një kundërsulmi të befasishëm, raporton The Guarduan.
Ndërkohë, në një intervistë të publikuar sot në Monde, ministri ukrainas i Mbrojtjes, Oleksii Reznikov, deklaroi se lufta në Ukrainë ka hyrë në “fazën e 3-të” dhe sukseset ushtarake ukrainase do të kenë një efekt “orteku” deri në humbjen e ushtrisë ruse, përcjell Albinfo.ch.
“Fushata kundërofensive është faza e 3-të,” tha Reznikov ndërsa forcat e Kievit përparojnë me shpejtësi në rajonet lindore dhe jugore të vendit dhe thonë se kanë rimarrë 3.000 metra katrorë territor që nga fillimi i shtatorit.
