Presidenti i Serbisë, Aleksandër Vuçiq tha sot se diplomatët evropian propozuan një kornizë të re të negociatave, që do të çojë deri në zgjidhjen e shpejt dhe përfundimtare për problemet në lidhje me Kosovën.
Fuqitë perëndimore presin një zgjidhje të shpejt dhe që Serbia ta njohë realitetin në Kosovë, kështu deklaroi sot presidenti i Serbisë pas mbledhjes së Këshillit të Sigurisë Kombëtare, duke bërë të ditur se ka marrë një propozim të ri për negociatat.
“Gjatë bisedës me përfaqësuesit e Olaf Scholz dhe Emmanuel Macron morëm një propozim të ri për bisedimet në Bruksel, i cili duhet të çojë në një zgjidhje të menjëhershme dhe përfundimtare të problemeve dhe të gjitha çështjet e pazgjidhura në Kosovës. Ajo marrëveshje do të nënkuptonte, nuk mund të them njohje të Kosovës, por do të ishte njohje e gjithçkaje që ata mendojnë se është realitet”, tha Vuçiq.
Sipas presidentit serb, përfaqësuesit e vendeve më të fuqishme evropiane, me mbështetjen e SHBA-së dhe Turqisë, besojnë se Evropa nuk ka nevoje për konflikte të reja në kushtet e luftës në Ukrainë, prandaj duhet të arrihet një zgjidhje përfundimtare ndërmjet Beogradit dhe Prishtinës.
Duke folur për takimin e djeshëm me zyrtarët evropianë, Vuçiq tha se bisedimet nuk ishin të lehta dhe u shpreh se është i shqetësuar për përshpejtimin në lidhje me Kosovën dhe se kur është fjala për Kosovën, Serbia është bërë dëm kolateral i konfliktit mes fuqive të mëdha.
Perëndimi beson, Vuçiq tha, se zgjidhja e mundshme e çështjes së Kosovës përmes pavarësisë së saj do t’i jepte përgjigje edhe presidentit rus, Vladimir Putin në lidhje me Krimenë.
“Atëherë do të thoshin se është arritur një marrëveshje nëse Krimeja dhe Ukraina arrijnë një marrëveshje, por pa të nuk është e mundur. Pra, ne jemi bërë dëm kolateral i konflikteve të mëdha”, ka thënë Vuçiq.
Presidenti serb tha se është informuar nga përfaqësuesit perëndimor se Putini ka ‘ngritur perden’ dhe tani i takon të gjithëve të deklarojnë se në cilën anë duan të qëndrojnë.
Vuçiq vazhdon të insiston se me vendosjen e bazave të njësive speciale të Policisë së Kosovës në veri, po shkelet Marrëveshjes së Brukselit, sepse kryetarët serbë nuk janë të informuar, shkruan RTK.
Sipas tij, qëndrimi për targat është ende i pandryshuar, dhe se serbët nga veriu i Kosovës nuk mbështesin vendimin për riregjistrimin në tabelat RKS.
