Greva në arsim në Kosovë ka hyrë në ditën e 15-të, e kjo grevë po shpresojnë edhe nga SBASHK-ut që të ndërpritet dhe të arrihet një marrëveshje me Qeverinë.
Për një marrëveshje të tillë sekretari i SBASHK-ut, Ymer Ymeri ndonëse thotë se nuk mund të parashikojë ndërprerjen e grevës, shpreson që në fundjavën që po vije të arrihet një marrëveshje.
Madje ai për këtë ka shpresë se është duke punuar edhe e para e vendit, Vjosa Osmani.
“Është shumë vështirë me parashikuar, por shpresoj dhe urojë që ky vikend me na gjetë me një marrëveshje. Po shpresojë që Presidentja është në gjetjen e një zgjidhje”, ka thënë Ymeri.
Ai ka thënë se Qeveria duhet të reflektojë dhe të gjendet një zgjidhje.
“Qeveria po tenton ta thyejë grevën dhe dëmtuar SBASHK-un duke i etiketuar në mënyra të ndryshme udhëheqësit e SBASHK-ut, por kjo formë nuk ka me pas rezultate. Qeveria duhet ti lë të gjitha intrigat dhe të ulemi të gjejmë një zgjidhje”, është shprehur ai.
Ai ka thënë se qasja e Qeverisë ndaj SBASHK-ut nuk beson se është personale, por thotë se ministrat e deleguar nga kryeministri për të biseduar me ta e kanë dezinformuar Kurtin.
“Ministrat që ai i ka deleguar për të biseduar nuk kanë qenë të sinqertë me kryeministrin të cilin e kanë dezinformuar”.
Duke komentuar mbajtjen e mësimit në disa shkolla në Kosovë, ai thotë mësimdhënësit të cilët po mbajnë mësim janë përkrahës të Vetëvendosjes.
“Mësimdhënësit që nuk po pajtohen më grevën janë përkrahës të Vetëvendosjes”, tha Ymeri, në Tëvë1.
Ai ka thënë se ka edhe mësimdhënës të cilët nuk janë pjesë e sindikatës e që nuk janë pjesë e grevës.
