Presidentja e Kosovës, Vjosa Osmani është shprehur e pikëlluar për lajmin e vdekjes së Mbretëreshes Elizabetë II, transmeton InLajmi.
Osmani e ka quajtur Mbretëreshen Elizabetë si një udhëheqëse të vërtetë dhe një grua të jashtëzakonshme.
Ajo ka thënë se populli i Kosovës bashkëndjen me zemër të rënduar me popullin britanik për humbjen e madhe të Mbretëreshës Elizabetë II.
Postimi i plotë i saj:
Qytetarët e Republikës së Kosovës, krahas miliona njerëzve anë e mbanë botës, janë thellësisht të pikëlluar nga lajmi për ndarjen nga jeta të Lartmadhërisë së Saj, Mbretëreshës Elizabeta II.
Mbretëresha Elizabeta e udhëhoqi Mbretërinë e Bashkuar me zell, me hir e përulësi dhe e vendosi shërbimin dhe detyrën ndaj vendit të saj mbi çdo gjë tjetër. Ajo ishte një udhëheqëse e vërtetë dhe një grua e jashtëzakonshme.
Vdekja e Lartmadhërisë së Saj shënon fundin e një epoke si monarkja më jetëgjatë në historinë e Mbretërisë së Bashkuar, por trashëgimia e Elizabetës së Madhe do të vazhdojë të frymëzojë breza të tërë.
Populli i Mbretërisë së Bashkuar na erdhi në ndihmë në ditët tona më të errëta, ndaj sot ne bashkëndjejmë me zemër të rënduar për këtë humbje të madhe së bashku me Familjen Mbretërore dhe të gjithë qytetarët e Mbretërisë së Bashkuar.
U prehtë në paqe Lartmadhëria e Saj!. /InLajmi/
