Drejtori i Agjencisë Kroate të Sigurisë dhe Inteligjencës, Daniel Markiç, ka thënë se Kroacia është e shqetësuar për sjelljen gjithnjë e më agresive të Serbisë, transmeton InLajmi.
Ai tha se pas agresionit rus kundër Ukrainës, janë zhdukur “vijat e kuqe” në komunikimin ndërmjet Kroacisë dhe Serbisë, sepse Kroacia nuk dëshiron tensione por marrdhënie normale me Serbinë.
“Ne duam marrëdhënie normale fqinjësore. Do të duhej të ishte lehtë, por për fat të keq, ajo çka ne marrim është sjellja agresive e Serbisë” ,tha Markiç.
I pyetur për ndikimin e Rusisë në situatën e sigurisë në rajon, ai u përgjigj se Intelegjenca kroate kishte paralajmëruar prej vitesh se Rusia mund të përdorte rajonin për të krijuar konflikt.
“Rusia ka një bazë të fortë në Serbi dhe po zhvillon një marrëdhënie të veçantë me Republikën Serbe, por ajo që po ndodh në BiH nuk është e gjitha për shkak të Rusisë. Mundësia e rrezikut ekziston dhe ne jemi të gjithë në gatishmëri, por për momentin nuk ka një kërcënim të qartë sepse Rusia është e preokupuar me Ukrainën”, tha Markiç në një intervistë për televizionin publik estonez.
Ai theksoi se agresioni rus në Ukrainë ishte një mundësi për Serbinë për të ecur drejt BE-së, por “ndoshta Serbia nuk është më e interesuar në atë drejtim”, dhe ajo duhet të zgjedhë një anë, nëse do integrim në BE.
Markiq theksoi se tash së fundi është vërejtur një ngjashmëri e pabesueshme me agresionin ndaj Kroacisë në vitin 1991, prandaj Kroacia është vazhdimisht në gatishmëri.
“Tani, edhe nëse harrohet ideja e një ‘Serbie të madhe’, tani kemi idenë e një ‘bote serbe’ që duket si ideja e një ‘bote ruse’. Nëse shikoni qëndrimin e qeverisë serbe, ata e quajnë qeverinë tonë ustashe në faqen e tyre zyrtare dhe politikanët e lartë në Serbi thonë hapur se duhet të mendojmë për denazifikim të rajonit”, tha drejtori i Inteligjencës kroate, transmeton agjencia Hina, shkruan Danas.
Sa i përket Bosnjë-Hercegovinës, Markiq theksoi se Kroacia dëshiron një Bosnje-Hercegovinë të bashkuar. Ai shprehu besimin se çdo hap në destabilizimin e Bosnjë-Hercegovinës do të përballet me një reagim të fortë ndërkombëtar, veçanërisht nga NATO./Inlajmi/Sh.O./
