Të hënën me 5 shtator, përkujtohet 6 vjetori i shenjtërimit të Nënë Terezës nga Papa Françesku. Shenjtërimi i Nënë Terezës u bë në një ceremoni madhështore në Sheshin e “Shën Pjetrit” në Vatikan, shkruan InLajmi.
Murgesha “u lumturua” në tetor të vitit 2003, nga Papa Gjon Pali II. Ai miratoi mrekullinë e parë pas vdekjes së saj. Një grua 30-vjeçare në Kolkata tha se ajo u shërua nga një tumor në stomak pas lutjeve të Nënë Terezës. Një komitet i Vatikanit tha se nuk mund të gjente asnjë shpjegim shkencor për shërimin e saj dhe e shpalli atë një mrekulli.
Anjezë Gonxhe Bojaxhiu, e cila më vonë e ndryshoi emrin në Nënë Tereza, lindi me 1910 nga prindër shqiptarë. Mësimet e para i mori në një shkollë në qytetin e Shkupit e në moshën 18-vjeçare u dorëzua murgeshë. Pasi u specializua në Irlandë u vendos në Indi, ku në vitin 1950 themeloi urdhërin e murgeshave “Misionaret e Bamirësisë”.
Nga ky moment Nënë Tereza do të bëhej nëna e të gjithëve dhe jetën do t’ia kushtonte të varfërve. Urdhëri i Nënë Terezës numëron mbi 4.000 misionare dhe është shtrirë në mbi 100 vende të botës. Nënë Tereza nuk e pranoi asnjëherë famën e shprehej se gjithçka e bënte për hir të dashurisë së Zotit. /InLajmi/
