Pas mosmbajtjes së rregullt të mësimit në shkollat e Kosovës, Ministria e Arsimit ka dalë me një komunikatë, në të cilët ka thënë se dyert e shkollave nuk duhet të mbyllen sepse humbja e mësimit është cënim i të drejtës themelore të fëmijëve për arsimim, përcjell InLajmi.
Nga Ministria e Arsimit kanë theksuar se kanë informata se ka pasur presione të shumta politike në disa shkolla për mosmbajtjen e mësimit.
Ministria e Arsimit i ka bërë thirrje Drejtorive Komunale të Arsimit që t’i përgjigjen obligimit dhe të mbajnë komunikime në vijë institucionale rreth vijueshmërisë së procesit mësimor në shkolla.
Postimi i plotë i Ministrisë së Arsimit:
Ministria e Arsimit, Shkencës, Teknologjisë dhe Inovacionit njofton se përkundër se janë bërë të gjitha përgatitjet për fillimin e vitit të ri shkollor, nga informatat jo të plota, kryesisht komunikim i zyrtarëve të MASHTI me zyrtarë komunal jemi informuar që shumica e shkollave në Kosovë nuk kanë mbajtur mësim për shkak të grevës së shpallur nga BSPK.
Sipas të dhënave të Ministrisë, situata dallon nga shkolla në shkollë, ku në disa ka nisur procesi mësimor e në disa të tjera mësimi është mbajtur pjesërisht.
Po ashtu, si Ministri e Arsimit jemi të informuar për presione të shumta politike tek shkollat.
Duke respektuar të drejtën e atyre që janë në grevë presim që të respektohet edhe e drejta e mësimdhënësve të cilët nuk janë në grevë dhe duan të punojnë.
Ministria e Arsimit, Shkencës, Teknologjisë dhe Inovacionit edhe njëherë ju bënë thirrje Drejtorive Komunale të Arsimit që t’i përgjigjen obligimit dhe të mbajnë komunikime në vijë institucionale rreth vijueshmërisë së procesit mësimor në shkolla.
Dyert e shkollave nuk duhet të mbyllen. Humbja e mësimit është cënim i të drejtës themelore të fëmijëve për arsimim. /InLajmi/
