Ministrja e Arsimit, Arbërie Nagavci, një ditë para fillimit zyrtar të vitit të ri shkollor ka bërë të ditur se ministria tashmë është në fund të përgatitjes së projektit për fushatën sensibilizuese për parandalimin e dhunës në shkolla, raporton InLajmi.
Nagavci ka theksuar që krahas edukimit dhe arsimimit gjeneratave të reja e domosdoshme është edhe sigurimi i ambienteve të sigurta.
Prandaj, ka theksuar Nagavci se qeveria Kurti top prioritet ka sigurinë në shkolla.
“Rishtazi e kemi finalizuar përgatitjet për fushatën e sensibilizimit për zbatimin e protokollit për parandalimin e dhunës dhe referimin adekuat të rasteve nga komunitetet tona shkollore. Më lejoni që nga këtu, të ngre zërin për nevojën e angazhimit të gjithmbarshëm të të gjitha palëve në këtë drejtim. Secili nga ne kemi rol dhe përgjegjësi në edukimin e gjeneratave të reja që janë të afta ta parandalojnë dhunën që promovojmë aktivisht barazinë gjinore e sociale. Për ne si Ministri e Arsimit, në vitin e ri shkollor që po fillon, siguria dhe krijimi i ambienteve të sigurta për fëmijë tanë do të jetë një nga top prioritetet dhe do t’i kushtojmë një angazhim e përkushtim të plotë”, ka deklaruar ajo.
E prekur tej mase ministrja Nagavci ka përmendur dhunimin e 11 vjeçares në Prishtinë, teksa theksoi se akterët e kësaj vepre duhet marrin dënimin më të rëndë, prandaj ajo kërkoi nga institucionet relevate zbardhjen sa më të shpejtë të rastit.
Tutje ajo ka thënë së pa marrë parasysh gjininë vajzë apo djalë ata kanë të drejtën e plotë të rriten në ambiente të sigurta.
“Duke shprehur indinjatën time të thellë për rastin e fundit brutal të dhunimit seksual të miturës 11-vjeçare nga 5 burra në Prishtinë. E dënoj fuqishëm aktin e tillë, duke bërë thirrje dhe duke pritur që reagimi i zinxhirit institucional të jetë i shpejtë dhe efikas në mbrojtjen e të miturës dhe ofrimin e shërbimeve mbështetëse në njërën anë, ashtu si dhe në zbatimin e procedurave ligjore për të dyshuarit në anën tjetër. Vajzat dhe djemtë tanë kanë të drejtë që të rriten në ambiente të sigurta dhe ne duhet t’u ofrojmë këtë siguri. Për ne si Ministri e Arsimit dhe për mua personalisht si ministre e Arsimit, është i pazëvendësueshëm roli i institucioneve edukativo-arsimore në zhvillimin e shoqërisë, ku fëmijët tanë ndihen të lirë, të sigurt dhe të barabartë pa asnjë dallim”, ka shtuar Nagavci.
