Në Ditën Ndërkombëtare të Personave të Zhdukur, Lidhja Demokratike e Kosovës, ka kujtuar ankthin e pritjes për 23 vite të familjarëve të të zhdukurve me dhunë nga Kosova, ndërsa theksohet obligimi institucional për zbardhjen e fatit të tyre, përcjell InLajmi.
Lidhja Demokratike e Kosovës, teksa ka vu në theks mungesën e mbi 1.600 personave të zhdukur gjatë luftës, ka kërkuar angazhimin e të gjitha institucioneve relevante në zbardhjen e fatit të tyre.
Nëpërmjet një komunikate për media, LDK-ja, ka kërkuar që përgjegjësit që kanë bërë krime mbi popullin e Kosovës gjatë të luftës së fundit në Kosovë të dalin para drejtësisë.
Tutje thuhet në komunikatën e LDK-së se të pagjeturit i mungojnë Kosovë, familjarëve dhe se ata janë plaga e të gjithëve.
Njoftimi i plotë nga Lidhja Demokratike e Kosovës:
Të martën shënohet Dita Ndërkombëtare e Personave të Zhdukur, ndërsa Kosovës ende i mungojnë më shumë se 1.600 persona të zhdukur nga lufta e fundit.
Tash e 23 vjet familjarët e të zhdukurve presin me ankth për ndonjë lajm për më të dashurit e tyre. Është detyrë e institucioneve të Kosovës dhe secilit prej nesh që të bëjmë sa më shumë dhe ta kemi prioritet çështjen e personave të zhdukur, derisa fati i tyre nuk është zbardhur; ndërsa dhimbja dhe vuajtjet e familjeve vazhdon të jetë e rëndë.
Përgjegjësit që kanë bërë krime mbi popullin tonë; vrasje, dhunime, maltretime, si dhe për fatin e të zhdukurve të luftës së fundit në Kosovë duhet të dalin para drejtësisë.
Të gjithëve na mungojnë: ata janë plagë e jona e përbashkët që nuk mbyllet pa e ditur fatin e tyre. /InLajmi/
