Ministrja e Arsimit dhe Sportit në Shqipëri, Evis Kushi, ka bërë të ditur së kanë filluar trajnimet e para të mësuesve për Abetaren e Përbashkët Unike Kosovë-Shqipëri, përcjell InLajmi.
Kushi ka thënë se nuk kishte se si të fillonte më mirë e më mbarë se kaq, pasi mësuesit po përgatiten për fillimin e vitit të ri shkollor.
Ndryshe ministrja ka njoftuar që nxënësit me datën një shtator do ta kenë në duar abetaren e cila është përgatitur enkas për ta.
Veç tjerash Kushi ka thënë së do të jetë në Kosovë dhe së bashku me ministren e Arsimit Arbërie Nagavci, do të promovojnë abetaren e unifikuar.
Postimi i plotë i saj:
Sot është dita e parë që mësuesit tanë në të gjithë vendin kthehen nga pushimet dhe fillojnë intensivisht punën për t’u përgatitur për fillimin e vitit të ri shkollor.
Nuk mund të nisnim më mbarë se sa me trajnimet e para të mësuesve për Abetaren e Përbashkët Unike, e cila tashmë është gati dhe këtë shtator do të jetë në duart e çdo vogëlushi.
Jam shumë e lumtur që në datën një shtator do të jem bashkë me Ministren Arbërie Nagavci në ditën e parë të shkollës në Kosovë, ku prej andej do të nisim promovimin e risisë më të bukur për të gjithë nxënësit dhe mësuesit.
Suksese dhe punë të mbarë për të gjithë mësuesit e Shqipërisë dhe Kosovës! /InLajmi/
