Kreu i AAK-së, Ramush Haradinaj ka thënë se marrëveshja e arritur mes Kosovës dhe Serbisë për dokumentet është një shenjë e mirë e vetëdijësimit se marrëveshjet duhet të zbatohen, përcjell InLajmi.
Haradinaj theksoi se është për keqardhje që për të njëjtën marrëveshje të arritur qysh në vitin 2011 është dashur të pritet kaq gjatë.
Sipas tij, marrëveshjet janë një nga një janë strategji e Serbisë për të blerë kohë e për ta vonuar Kosovën.
Tutje, kreu i AAK-së shtoi se tashmë interesi shtetëror, nacional e qytetar i Kosovës është marrëveshja përfundimtare për njohje reciproke, e cila sipas tij nuk mund të arrihet pa përfshirjen e drejtpërdrejtë të SHBA-ve.
Postimi i plotë i tij:
Dakordimi që të zbatohet një marrëveshje për dokumentet, e arritur qysh në vitin 2011, është një shenjë e mirë e vetëdijësimit se marrëveshjet duhet të zbatohen. Është për keqardhje që është dashur të pritet kaq gjatë e të shpenzohet kaq mund e energji për zbatimin e një marrëveshjeje që mundëson lëvizjen e lirë të qytetarëve të të dyja vendeve.
Marrëveshjet një nga një janë strategji e Serbisë për të blerë kohë e për ta vonuar Kosovën.
Interesi shtetëror, nacional e qytetar i Kosovës është marrëveshja përfundimtare për njohje, e cila mund të arrihet vetëm me përfshirjen e drejtpërdrejtë të Shteteve të Bashkuara të Amerikës, pa ndihmën e të cilës nuk do të fillonte as zbatimi i marrëveshjes për dokumentet e identifikimit.
Kanë kaluar njëzetë e sa vjet ç’prejse është krijuar një realitet i ri në Kosovë dhe mbi katërmbëdhjetë vjet qysh Kosova është shpallur shtet sovran dhe i pavarur. Tash është koha e duhur që dialogu të kalojë në një nivel tjetër dhe Serbia ta njohë Republikën e Kosovës. /InLajmi/
