E keni parasysh momentin kur duket sikur po plasni nga ushqimi, madje si me stil keni zbërthyer dhe një kopsë nga pantallonat apo këmisha, vjen kamarieri me mirësjellje dhe ju pyet “Ëmbëlsirë”?
Truri thotë “po”, zemra “poooo”, stomaku nuk ka forcë të flasë dhe sigurisht, ju thoni “po, menunë të lutem”. Ja, i gjithë ky procesi, kur ne nuk i themi dot “jo” një ëmbëlsire që na thotë me sy lutës “merrmë”, ka një shpjegim shkencor dhe një term të caktuar, “dessert stomach”.
Mbi këtë, janë kryer disa studime, të cilat tregojnë se ne mërzitemi duke konsumuar të njëjtin ushqim, por uria jonë mrekullisht “ringjallet” kur na propozojnë një ushqim të ri. Pra, pas pastave, na duhet një tiramisu ose soufle. Sipas Dr. Barbara Rolls, profesore dhe studiuese me një eksperiencë 40-vjeçare, sa më tepër ta konsumojmë një ushqim, aq më të ngopur do të ndihemi prej tij.
Studimi u krye edhe me të tjerë pjesëmarrës, të cilët u ndanë në dy grupe:
Grupi i parë konsumoi 4 pjata me të njëjtin ushqim.
Grupi i 2-të, 4 pjata me të tjerë përbërës.
Në përfundim, grupi i 2-të konsumoi rreth 60% më shumë kalori, pasi ishte i interesuar dhe kurioz për të provuar pjatat, ndërsa grupi i parë, e humbi shumë shpejt interesin (dhe me të drejtë), transmeton Anabel Magazine.
Të njëjtën teori duhet të ndjekim edhe në dietat e përditshme, pasi duhet të konsumojmë një gamë të gjerë ushqimesh, në mënyrë që t’i shijojmë dhe të marrim kënaqësi dhe përfitime prej tyre.
